Accueil Tamazight Asfuggel n wass n tmussni d Tefsut n Yimaziɣen

At Smaεel

Asfuggel n wass n tmussni d Tefsut n Yimaziɣen

79

I wakken ad yeqqim d asmekti, i wakken amezruy ad yidir, ur yettruḥu ara, yewwi-d ad t-ssisnen i warrac. Imi d wigad ara t-ireffden sya ɣer sdat. Daymi i d-ihegga uɣerbaz amenzu Taregragt taqbuṛt deg At Smaεel, yiwen n ttiεad s wazal-is. Ayagi, i lmend n wass n tmussni i d-yettilin deg 16 yebrir, akked Tefsut n Yimaziɣen i d-yettilin deg 18 yebrir n yal useggas. Imḍebbṛen n uɣerbaz-a, ran ad xedmen yiwen n temsizzelt gar tneɣṛiyin n yiswiren ineggura n yiɣerbazen ifazzen deg temnaḍṭ-a. Dɣa ttiεad-a, ad d-yili d tajmilt i wid yefkan tudert-nsen d tasfelt ɣef teqbaylit d tmaziɣt s umata. Am wakken ad yili daɣen d tagnit i tmussni, d usteεfu.

Ɣef usentel-a, iwekked-aɣ-d unemhal n uɣerbaz-a belli ahil ad yili d amerkanti gar ccna; amezgun; isefra d tmucuha, i yesεan azal meqqṛen deg usissen n umezruy i warrac. Dɣa ula d isental n leqdic-a, cudden akk ɣer Tefsut Taberkant, d wass n tmussni. Am wakken ara d-tili temlilit-a d aheggi i yikayaden n taggara n useggas. Ad d-nesmekti d akken, kraḍ n yiɣerbazen ara yemḥezwaren ɣef umḍiq amezwaru, dɣa win i d-yufraren, ad ikemmel amecwar n temsizzlin, lameεna tikkelt-a mačči di tɣiwant, meεna di tḍayṛa, gar yiɣerbazen i d-yufraren di yal taɣiwant n tḍayṛa n Yiderginen. Arrac n uɣerbaz-a, tehwa-asen tikti nezzeh, acku bdan aheggi n lecɣal, d yiselsa-nsen seg tura, rnu i waya, zgan feṛḥen ccmummḥen, ula d ameslay-nsen ala ɣef ttiεad-a.

K.K.