Accueil Tamazight Asileɣ ɣef waṭṭanen n umaḍal n tzizwa deg ttrebga-nsent

Iderginen

Asileɣ ɣef waṭṭanen n umaḍal n tzizwa deg ttrebga-nsent

101

Tettkemmil tddukkla Oxy-jeunes n Yiderginen asuddes n warmuden yemgaraden i ubaɣur n tmetti tadigant d uzayez s umata. Dɣa, tikkelt-a d yiwen n usileɣ n uselmed d usḥulfu i d-thegga, s tallelt n Uḥuddu n tẓegwa, ɣef umaḍal n tzizwa d waṭṭanen akk i yettḥazen tiɣrasin, iwumi semman: « Aṭṭanen ubrizen deg uṛebbi n tzizwa ». Deg uxxam n tddukkla anda yemmug warmud, iga-d Mass amussujji Zeryer Yasin asileɣ ɣef taluft-a s uḥḍar n yikerrazen d kra n yimezdaɣ iwumi yehwa usentel-a, imi yewweḍ umḍan n yimeḥḍar ɣer 18 n yimdanen.

Gar-asen wid i d-yusan ula seg Bgayet, Ticci, Melbu, Draɛ Lqayed akked, iban, Iderginen. Akken ad yeshel ujerred ɣef yimekkiyen yeggugen, yella-d i l mendad-nsen si tazwara unermis anda zemren ad ḥerzen amḍiq. Ad d-nesmekti d akken, akken i d-yedda deg wahil, yekcem uqeddic-a deg yiswi n usnerni n tneflit n tfellaḥt tadigant n Yiderginen, abeɛda aḥric n uṛebbi n tzizwa. Seg 09:00 n tnezzayt ihi, yebda usileɣ-a i d-yewwin ayendin d isallen d tmussniwin i yimekkiyen, deg yiwet n tegnit n ucmummeḥ d umbaddel n tektiwin i yerzan taɣult-a taxatart n usker n tzizwa.

Ɣef wawal n yiɛeggalen imheggiyen, iɛedda usileɣ-a akken iwulem lḥal. Daymi tesnemmir tddukkla « Oxy-jeunes » n Yiderginen wid i d-yusan, i yekkin deg usmurres n usihar, tugart-tugart aduktur Zeryer ɣef yiwellihen-is d tnimar i iga teɣzi n usileɣ. I lmend n ugemmuḍ n umezwaru-a, nnan-d yimḍebbren n tddukkla tadigant, aql-iten heggan ad d-suddsen tiɣimiyin-nniḍen n yisilaɣ ɣef leḥsab n wayen iwumi sran yikerrazen n tɣiwant n Yiderginen.

M. K.