Ilul Malek Wari ass n 27 deg yennayer 1916 deg Iɣil Ɛli di Bgayet. Yeɣra deg uɣerbaz amenzu n taddart-is uqbel ad yinig ɣer Lezzayer tamanaɣt anda ara yelmed tasekla d tfelsafit. Yuɣal d aselmad n tsekla yerna d aneɣmas di rradyu Radio-Alger anda yuɣal d imḍebbar. Yekcema nnar n umgar n tmedyazt deg ubrid n usaḥbiber ɣef yidles d tutlayt tamaziɣt ɣer tama n tira n warraten ɣef tudert n leqbayel deg tesɣunin am Ici Alger.Yunag ɣer Fransa yezweǧ.
Dinna i ikemmel deg tira di tɣamsa akked tira taseklant. Yexdem deg L’ORTF di Lpari deg useggas n 1959 armi yeffeɣ tastaɣt. Yura deg 1972 Poèmes et chants berbères de Kabylie, yerna-d wis sin (La montagne aux chacals) deg useggas n 1981. Ad nerǧu alamma d aseggas n 2000 akken ad nwali ungal-is wis kraḍ La robe kabyle de Baya. Yemmut ass n, 21 deg dujember 2001, di Fransa di lεemr-is 85 n yiseggassen.Ɣas yefka tudert-is i teqbaylit, maca idlisen-is, xussen aṭas neɣ tikwal ulac-iten di tmurt. Yura s imeṭṭi d waṭas n yiḥulfan. Tuɣal-as tejmilt sɣur ucennay Uleḥlu i netta d yelli-s n tmurt-is Tawes Ɛamruc imi ɣas ttruḥun wudmawen,ttɣimin-d yismawen.
Nisma Tigrine