Accueil Tamazight Asmekti n tmettant n ucennay Hamidouche

Udem gar wudmawen

Asmekti n tmettant n ucennay Hamidouche

184

Ass-nni n lǧemɛa, 05 yunyu 2020, i zzmen 18 n yiseggasen ɣef wasmi teǧǧel tezlit taqbaylit.

Tuɣal d tagujilt, mbeɛd mi i tt-yeǧǧa yiwen gar tgejda-s, meɛna yeǧǧa-as-d. Yeǧǧa-d diɣ, ayen swacu ara t-id-ttaddren medden, daymi qqaren wat zik : « Ttruḥun wudmawen, ttɣimin-d yismawen ». Anwa Aqbayli, ur necfi ɣef wass-nni n larebɛa 05/06/2002, mi d-yewweḍ lexbar, teḥzen temnaḍt n Makuda imi yemmut yizem-is ɣlayen. Yeɣli-d lweḥc deg uzal qayli, ulac win ur iɣaḍ ara. Ḥmiduc, neɣ s yisem-is aḥeqqani Ḥmed Xeddim (Ahmed Khedim), d acennay n teqbaylit yerna d amedyaz. Ilul ass n, 14 ɣuct 1956, deg Ugni n Waklan deg taddart n Ɛeṭṭuc, taɣiwant n Makuda, deg lwilaya n Tizi Uzzu, deg tmurt n Leqbayel. Ilul-d deg yiwet n twacult talemmast kan, yella diɣ d ababat n 04 n warraw-is. D ilemẓi n 45 n yiseggasen kan d leɛmer, asmi medlent wallen-is, tcelqef-it lmut, yeǧǧa ddunit ur tt-yeṛwi, yezger ɣer laxert. Wagi ihi d acennay ameqqran Ḥmiduc, iwumi iɣab ṣṣut-is d wudem-is, maca mazal tizlatin-is suzunent win ara asent-yeslen. Iruḥ yitri n ccna n teqbaylit, i yesuznen ayen din d ilmeẓyen. S ṣṣut-is ḥninen, yeččuren d sser d wawal iweznen i yezdeɣ ulawen n medden. D acennay n tayri zeddigen d wuguren n tmetti taqbaylit. Acḥal d ulawen i yezha, acḥal n tmeɣriwin icebbeḥ s tezlatin-is igerrzen mačči d kra. Yemmut ass n, 05 yunyu 2002, deg temdint n Marseille n tmurt n Fransa, di leɛmer-is ala 45 n yiseggasen. Ma d ssebba n tmettant-is d aṭṭan n tgeẓẓal, i t-yeṭṭfen acḥal d lweqt. Ass n 11 yunyu 2002, wwin-d lǧessa-s s axxam-is yellan deg taddart n Taksebt, wallan-t medden i tikkelt taneggarut. Aṭas n yinaẓuren imeqqranen i iḥedren tamḍelt-is, yecban : Lewnis At Mengellat, Baɛziz, Amar U Rabaḥ, Buǧemɛa Agraw…at. Yettwamḍel deg taddart-is tanaṣlit Agni n Waklan.

Abruy seg umecwar-is di ccna

Deg useggas n 1964 i yecna i tikkelt tamezwarut ɣef usayes akked ucennay Racid Meṣbaḥi, dɣa yefka-as afud meqqren akken ad yecnu. Tizlit akk tamezwarut yecna d asefru-nni « A Wiza semmeḥ-as » i yura s timmad-is. Syin akkin yebda asekles n yiḍebsiyen armi yeṣṣaweḍ 11 n yiḍebsiyen. Amezwaru yecna-t deg useggas n 1980, ma d sin ineggura yessuffeɣ-iten-id deg useggas n 1993. Yesɛa yiwet n ṣṣut dayen kan, d win n waqqur. Ulac ilemẓi neɣ tilemẓit ur yesuzen ara, ḥemmlent akk yilmeẓyen. Yecna gar 1978 armi d asmi yuḍen di 2001. Deg useggas n Tefsut n yimaziɣen (1980), yessuffeɣ-d tasfift-is tamenzut i wumi isemma « Kret ay ayetma ! », ideg llant 09 n tezlatin. Gar-asent : A Wiza semmeḥ-as, Kkert ay aytma ! Seṭṭac di leɛmer-is, Lbumba, Nadya ruḥ…atg. Syin akkin, seg useggas n 1980 armi d 1986, yessuffuɣ-d tasfift di yal aseggas. Ffɣent-d akka myezwarent ; Inna-as inna-a 1981, Lemḥiba-w temmut 1982, Kker a gma ad nruḥ 1983, Sidi Lmir 1984, Lezzayer-Tunes 1985, Targit 1986. Tin ɣur-s, yeqqim armi d 1988, i wakken i d-yerna tasfift-agi Ayayay, syin yerna 3 n yiseggasen d wakken i d-yessufeɣ album wis 09, i wumi isemma « Le parti ». Sin n yiseggasen mbeɛd, di 1993 ikemmel-d sin-is iḍebsiyen ineggura ɣef tikkelt, wigi d « Azzayri » akked « Tafat ». Syin akkin, seg useggas n 1993 armi i d-tewweḍ Tefsut taberkant deg aseggas n 2001, ikemmel kan yecna deg tmeɣriwin, maca ur d-yessuffeɣ ara.
Adaoun Abdelghani