I lmend n usmekti n umulli wis 65 ɣef tmettant n umeɣras n tegrawla n tlelli taɣelnawt, Didouche Mourad, ad as-terr taddart n Ibeskriyen, taɣiwant n Uɣrib, taddart n twacult n umeɣras, tajmilt meqqren ass n, 18 seg waggur n yennayer i deg-i nella. Aṭas n leqdicat ara d-yilin bedemma. Dɣa deg tazwara, ad d-yili usersi n tmeqqunt n yijǧǧigen deg usmektay n yimeɣrasen n taddart n Ibeskriyen. Syin, ad d-tili tẓunẓut n useḅdad (statue) i usaḍ d yimḍebber amezwaru n lwilaya tis snat (II) (Qsentina), yefkan idammen-is i tlelli n tmurt n Lezzayer.
Yerna ɣer yimeɣrasen ass n, 18 seg yennayer 1955. Aṭas n leqdicat idelsanen, inaddalen ara yilin. Dɣa, ad d-tili temsizzelt n tazla, isaragen, timsikniyin n tegniwin n tegrawla n umeɣras. Ilul Didouche Mourad, iwumi qqaren yimawlan-is Abdelkader n taddart n Yibeskriyen, dayra n Uzeffun, taɣiwant n Uɣrib ass n, 13 seg waggur n yulyu 1927, deg tmanaɣt. Yemut ass n, 18 yennayer 1955, deg temḍiqt n Bukerker yewwin isem ass-a n Zighoud Youcef, deg temdint n Qsantina, deg tṛad n Ddewar Swadek.
Yella gar yimeɣnasen iɣelnawiyen imenza deg Umussu n tlelli taɣelnawt. Amwakken yella, daɣen, gar sḍis n yiɛeggalen i d-yesbedden (ixelqen) akabar n Tirni n Teslullit Taɣelnawt (FLN). Yellul umaɣras deg uzniq n Redoute iwumi qqaren tura taɣiwant n Lmuradiya. Yeɣra deg uɣerbaz amenzu d uɣerbaz alemmas deg Lmuradiya, syin yekcem ɣer tesnawit tatiknikit n Rwissu n Lezzayer. Deg useggas n 1947, itteka deg uslali n Tuddsa tusligt (OS), yettabaɛen ɣer ukabar n Umussu n Walek n Tlelliyin Timagdayin (MTLD ).
Deg useggas n 1952, netta d Mostafa Ben Bouaid, xalqen-d yiwet n terbaɛt iqeddcen s tufra deg uɣaref n tafezwayin ( fabrication de bombes), akken Ad d-heggin i tnekkra n tegrawla. Deg tezɣent n yiseggasen n 1953-1954, tella-d tmagla deg ukabar n Umussu n Walek n Tlelliyin Timagdayin (MTLD) n tesqqamut tanammast n ukabar n Msali Lḥadj, yunag ɣer tmurt n Fransa, anda yuɣal d arnaw (adjoint) n Mohamed Boudiaf, deg teqbilt n ukabar n MTLD deg Fransa.
Deg useggas n 1954, ittekka d Ahmed Mahsas deg uheggi n yiwen usenfar ɣef ukabar n tegrawla. Deg waggur n meɣres seg useggas n 1954, uɣalen Mohamed Boudiaf d Didouche Mourad seg yinig, dɣa sawlen i kra n yiɛeggalen n Tuddsa tusligt (OS) i uxlaq n ukabar ara iseddun tegrawla. Ɣef leḥsab n yimussnawen n umezruy, yella Didouche Mourad gar widak ittekan deg tira n tseɣṛut n umezgun n unbir 1954.
Ali Zalouk