Accueil Tamazight Asmekti wis 21 n tmenɣiwt ...

Wehran : Asmekti wis 21 n tmenɣiwt n unazbay

103
- PUBLICITÉ -

Ulamek ara tezgel tddukkla Numidya asmekti wis 21 n tmenɣiwt n unazbay n tezlit taqbaylti, n unaẓur Lwennas Meɛtub.

- PUBLICITÉ -

Ɣas mačči deg waṭas i d-usan ad ḥeḍren i teswiɛt, maca “tigawt ilaq ad d-tili ɣas ma deg mraw neɣ snat n tmerwin yid-neɣ. Tajmilt n Lwennas ur ilaq ara ad tt-nezgel deg uxxam n tddukkla am wakken nennum nxeddem-it 20 n yiseggasen-aya ar deffir”, i d-yenna uselway n tddukkla Mass Saɛid Zeɛmuc.

Deg wass n tmenɣiwt-is aram 25 yunyu, i d-mmlalen i usmekti d umeslay ɣef uzamul. Ɣef 16h 00 n tmeddit, ceɛlen 21 n tcemmuɛin i d-yesmektayen 21 n yiseggasen segmi i aɣ-yeǧǧa Lwennas, bab n tebɣest.

Syin, d ddqiqa n tsusmi ɣef rruḥ-is, uqbel ad d-yefk awal uselway n tddukkla ɣef tudert n Lwennas d tirza i yella ixeddem ɣer umalu n tmurt, gar-asen tamdint n Wehran uqbel tamettant-is. Syin tella-d tɣuri n sin n yisefra d kraḍ n yiḍrisen n tejmilt, yettwarun s tmaziɣt. Ar deqqal, tella-d tedwilt n usaru ɣef tudert n unazbay d tnagit n kra seg wid i t-yessnen d wid i t-iqerben i wazal n 40 mn.

Ar taggara, d awal n yimeḥḍar, yal wa yefka-d tanagit-is d wayen yeẓra fell-as, d tebɣest swayes yettwassen Lwennas, imi d yiwen yettsemmiḥen deg yiman-is akken wiyaḍ ad idiren di talwit. Mmeslayen-d daɣen ɣef wass-nni amcum n, 25 yunyu 1998, i ikecmen deg umezruy, yal wa anda i t-tuɣ yella ass-n.

Temmuteḍ akken lebda ad tidireḍ

Ɣas temmuteḍ, ur temmuteḍ ara, lmut-ik d talalit, d talalit-nniḍen, d talalit n lebda. Temmuteḍ akken lebda ad tidireḍ, deg wulawen teddreḍ, d lɣiba ay tɣabeḍ, wama mazal tcennuḍ, ṣṣut-inek simmal yettbeɛziq. Wid ur d-nlul ara mi akken di terga teɣliḍ, refden isem-ik ass-a, cennun s tmuɣli-k, ddan d ubrid-ik, deg-sen teẓẓiḍ tissas, tabɣest, asirem.

Wid-nni i ak-tt-yundin, mi ɣilen nɣan-k, d tanekra ay ak-id-ssekren. Ɣas ass-a tgedlem annay, maca ḥṣut ur tezmirem ara ad tgezmem ameslay, aḥulfu, tidet, tayri d timmuzɣa. Truḥeḍ a Lwennas, kkren-d yigiman n Lwennas. Nɣan tafekka-k, i ugerruj-nni, anwa ara t-yenɣen ? I yidles-nni anwa ara t-yemḥun ?

D awezɣi ad tettwattuḍ, axxam-ik d axxam-nneɣ, d axxam n teqbaylit, d axxam n tmazɣa. Kečč d azamul, d tabɣest, d anazbay. D awezɣi ad tɣibeḍ, urǧin temmuteḍ. Aql-ak teddreḍ i lebda.

Kh. A.

- PUBLICITÉ -