Accueil Tamazight Asmekti wis 59 n tmettant n Imache Amar

At Mesbaḥ

Asmekti wis 59 n tmettant n Imache Amar

38

Ass-nni n lǧemɛa, 08 deg furar 2019, i d-yella usmekti n tmettant tis 59 n umeɣnas ameqqran deg Umussu aɣelnaw, Amar Imache. Yebda leqdic-agi, ass-nni sem 08 deg waggur-agi n furar ideg nella. Ɣef 09h30 n ṣṣbeḥ, ruḥen akk medden ɣer taddart-is tanaṣlit Ait Mesbah deg dayra n Ath Dwala, anda sersen tameqqunt n yijeğğigen ɣef usebdad n taddart n Ait Mesbah, syin sersen tayeḍ ɣef uẓekka n Imache, yellan deg taddart-is.

Ɣef 10h30, sakin yella-d diɣen umeslay sɣur waṭas n yiwudam d yimdanen, gar-asen : Nabila Goumeziane, aɣella n dayra n Ath Dwala, aselway n tɣiwant n Ath Dwala, atmaten d warraw n Amar Imache. Tella-d diɣ temsikent ɣef tudert d umecwar n urgaz-agi ameqqran n tegrawla. Annect-agi, yella-d deg uɣebaz amenzu Hamroun Med Arezki n taddart Ath Mesbah.

Am wakken daɣen i d-tella tegnit i tnagiyin d umeslay sɣur wid i t-yessnen. Ɣer tama n leqdicat-nniḍen, tella-d diɣ tasebḥit, ɣef 08h00 tedwilt n rradyu n Tizi Uzzu, anda i d-mmeslayen yiɛeggalen n tiddukkla-agi ɣef leqdic-nsen d yimuhal n umeɣras-agi.

Ma deg uxxam n yidles Mulud Mεemmeri n temdint n Tizi Uzzu, llant-d snat n temsikniyin, yiwet n tudert d umecwar-is deg Umussu aɣelnaw d tegrawla tazzayrit, ma tayeḍ n tegniwin-is. Am wakken i d-yella usenzi n yidlisen sɣur kra n tezrigin akked usenzi s ubuddu n yidlisen. Ahil-agi i d-yettwaheggan sɣur tanmehla n yidles n Tizi Uzzu, yella-d si 9h00 armi d 16h00 deg Uxxam n yidles Mulud Mɛemmeri.

Tudert n Amar Imache

Ad d-nesmekti belli, aṭas n yidisan d tamiwin i yettekkin deg useddes d uheggi i leqdic-agi adelsan, ad d-nebder deg-sen: Tanmehla n yidles, Axxam n yidles Lmulud At Mεemmer, Dayra d tɣiwant n Ath Dwala, s tallelt n tiddukkla tadelsant Amar Imache akked Teseqqamut n taddart-agi-ines(…)atg.

Ilul ass n 07 deg yulyu 1895, deg taddart n At Mesbaḥ deg Wat Dwala. D argaz n tsertit, d amussnaw ameqqran u d ameɣnas deg Umussu aɣelnaw azzayri. Yella d imsbeddi n ukaber n Yitri n Tefriqt n Ugafa (ENA). Yella deɣen deg lwaqt-nni d amaray amatu n ukaber-agi diɣen d amassay n tira (redacteur en chef), deg uɣmis « EL Ouma ».

Yettwaṭṭef ɣer lḥebs ass n 05 deg unbir 1934, yeqqim dina azal n 6 wagguren, yerna ixeleṣ tabzert n 2 000Franc, yeffeɣ-d deg useggas n 1935. Iker-d mgal asenfar-nni n “Blum- Voilette” n 1936; d ayen i d-ibanen deg warrat-is amezwaru“ L’Algérie au Carrefour”. Yura azal n 16 n waraten d yimgraden, gar 1934 d 1946. Yemmut ass n 7 deg waggur n furar n 1960, yeğğa-d sin watmaten akked 5 n warraw-is.

A. A.