Seldazekka, 13 furar, ad mden 9 n yiseggasen segmi i aɣ-yeǧǧa unaẓur Raḥim deg leɛmer-is 46 n yiseggasen. Segmi yella d amecṭuḥ, iḥemmel Raḥim ad yecnu, ad yurar tagiṭart. Armi d temẓi, yessekles tasfift-is tamenzut deg useggas n 1982, deg Yiɛeẓẓugen. Maca, imi ur d-teffiɣ ara tɣara tgerrez, ibeṭṭel-itt. Armi yeɛfes deg wakal n Fransa deg 1984.
Deg Paris, imuger-it s wudem yelhan ucennay Aqbayli Fahem i yellan yesɛa ttberna-aseččay dinna. Syin, kra n wayyuren, d netta i t-yewwin ɣer yiwen n ustudyu n usekles deg Val-de-Marne. Ulamma yesɛedda tuɛert send ad yenǧer abrid-is, segmi yewweḍ wayen icennu i medden, yuɣ amḍiq deg wulawen-nsen.
Ula d iseggasen-nni ideg i d-yettban s waṭas deg terga n BRTV, mazal resxen di ccfawa n Yiqbayliyen. Ugar n tidet i iḥemmel ad d-yini di ccna-s ɣef tayri d tmetti abeɛda, yettwassen Raḥim s yiḥulfan-is deg yakk tizlatin-is, am “Yya-d ad am-iniɣ“, “Ay ul-iw susem“, “Ass-n mi stenyaɣ fell-am“ d tiyaḍ.
Aṭas i llan ḥemmlen-t, mačči kan ɣef uɣanib-is n ccna, maca ula ɣef ssifat n umdan i yesɛan medden akk d leḥbab-is, i iheggan ad iɛiwen yal tikkelt ara yizmir. Deg umecwar-is n ccna, ɣas d awezlan, yessekles 9 n yiseɣraz, am “Llsas”, “Zeɛbala”, “A ccrab, a ccrab”, “Aḥlili, aḥlili”, “Yya-d ad am-iniɣ”, “Acimi acimi, “Ḥader iman-im”, “Cerwen tizemrin” akked “Ay akal”.
Am wakken iga ddeqs n yimsinen (duos) akked tcennayt Yasmina i as-yerran tajmilt dɣa s tezlit “Yemma Ḥnini”. Ilul Muḥemmed Raḥim, s yisem-is n tidet, ass n 7 duǧember 1963 deg Ayt Ɛisa Mimun. Yemmut ass n 13 furar 2010 s teɣẓint n wul, di sbiṭar n Tizi Uzzu. Ass-a, am yakk inaẓuren, ɣas tɣab tfekka-s, yedder netta s tẓuri i d-yeǧǧa.
M. K.