Skud tettqerrib-d tsemhuyt n unebdu, skud yettili-d uheggi i umager-is seg yal tama, acku d tasemhuyt i d-yettafen tuget n medden deg yimuras. I wakken ad kksen lxiq, ad sɛeddin talliyin igerrzen, laqen ladɣa ttawilat n usiweḍ, s wid n lqaɛa, s wid-nniḍen. Ɣef waya, yella-d usnulfu n yiwen n yizireg n yigenni d amaynut, ad yettawi gar temdint n Wehran (Lezzayer) akked temnaḍt n Ǧerba deg tmurt n Tunes. Ad yebdu uzireg-agi seg umenzu n yulyu i d-iteddun.
Akka i d-yenna Mass Fouad El wad, anemhal n umaris aɣelnaw n tmarrit n tmurt n Tunes deg Lezzayer. Adur-agi ara icudden gar snat n temdinin-a, ad d-yili i tikkelt tamezwarut, ad ikemmel akken alamma d taggara n unebdu, ass n 15 cutember, ad d-ilint ɣef teɣzi n wakud-a mraw (10) n yinigen. D awelleh kan, belli d ajerriḍ n yigenni n tmurt n Tunes ara d-yessuddsen ccɣel-a. Ɣas akken nennum nettwali d imelyan n Yizzayriyen i yettawin iberdan-nsen ɣer Tunes ad ssezrin ussan n usteɛfu, maca ula d Itunsiyen seg tama-nsen, aṭas deg-sen i iḥemmlen tamurt n Lezzayer ladɣa imi wessiɛet, ad fernen tamdint neɣ adeg i asen-yehwan akken ad sɛeddin deg-s akud.
Ma d timental n usnulfu n leqdic-a, d anerni s waṭas umḍan n yimsiklen itunsiyen deg tmurt n Lezzayer, imi yewweḍ ɣer umelyun d 300 n yigiman aseggas yezrin. Ma d tallit i smenyifen ad d-rzun ɣer Lezzayer ɛlaḥsab n Mass El wad dima, d tallit gar waggur n furar d waggur n mayu, d anemgal n rrwaḥ n yimelyan n yimdanen izzayriyen ɣer Tunes i d-yettilin deg yixef n useggas amaynut akked teɣzi n tsemhuyt n unebdu (seg yunyu ɣer ɣuct). Annect-a akk, yella-d i lmend n teẓrigt tis 10 n tzeqqa tagraɣlant n tmarrit d yinig i d-yellan deg Wehran (ammas n yimtawiyen) deg wussan n 21 ar 24 furar 2019. D tagnit i texxamin-a (agences) n tmarrit n tmurt n Tunes i iḥeḍren deg tzeqqa-a s ṭṭaqa, imi kkint wazal n 80 tkebbaniyin. Akken daɣen, ad ssisehlen inig i d-yettilin gar snat n tamiwin, u ad sneɣsen seg kra n wuguren i d-ttmagaren yimsiklen deg wayen iɛeddan.
Khaled Achoui