Accueil Tamazight Ass amaḍlan n tmeṭṭut

Bgayet

Ass amaḍlan n tmeṭṭut

56

Ɣas ma yella mgaraden wansayen seg tmurt ɣer tayeḍ, u ɣas ma yella mkul yiwen amek i d-yekker, amek i yettidir, lameεna tameṭṭut di tmetti s umata, ladɣa deg tallit yezrin, ur tesεi ara izerfan yemtawan d wid n urgaz. Ma nekkes Imaziɣen, tameṭṭut deg wakud yezrin, tella tettwaḥqeṛ ɣur kra n yiɣeṛfan. Di lawan anda i neqqen lxalat, ɣur yimaziɣen d nutenti i yeṭṭfen taqacuct.

Tameṭṭut tamaziɣt si zik ur tekni ara i ddel, amedya d Dihya, i yuraren nnuba n mraw n yirgazen, teffeɣ-d mgal acengu ineslem ameṣbaṭli. Ma yella deg tallit n tegrawla mgal iṛumyen, ffɣent teqbayliyin tiḥṛaṛ ɣer yidurar i wakken ad ssufɣent iεdawen, am Lalla Faḍma nsumer, d Ḥasiba Ben Buεli. Ayagi yesbeyyin-d belli tameṭṭut taqbaylit, urǧin tebra i nnif-is ɣas ma yella tezga d tilellit.

Lbaṭṭel d lḥif i d-yemmaren ɣef tullas deg umaḍal, demmren-tent i wakken ad kksent azeglu ɣef yiman-nsent. Ayagi, yella-d i tikkelt tamezwarut deg yiɣerfan n Marikan yedduklen deg useggas n 1909. Imi ffɣent tlawin ɣer yiberdan, ssutrent azref-nsent i uxeddim, d tlelli n umeslay d waṭas n temsal-nniḍen. Seg yimir-n uɣalent tmura sfuggulent ass-n, armi yuɣal 08 di meɣṛeṣ d ass amaḍalan n useḥbiber ɣef yizerfan n tlawin.

D ayen ibanen, tameṭṭut d llsas n tmetti, d tigejdit n uxxam, d tala n leḥnana, d azamul n tebɣest d umennuɣ. Ihi mačči ala yiwen n wass deg useggas i tuklal i wakken ad tt-id-yemmekti yiwen. Meεna tameṭṭut, teḥwaǧ leqdeṛ, asayes, awal lεali yal ass. Tamurt yebnan ɣef tmeṭṭut, llsas-is d awezɣi ad yeɣli. Ihi nekni seg tama-nneɣ ad d-nini tafaska tamerbuḥt i tullas n umaḍal.

K.K.