Accueil Tamazight Ass n usileɣ i lmend n yiselmaden n tmaziɣt

Tizi Uzzu : Ass n usileɣ i lmend n yiselmaden n tmaziɣt

94
- PUBLICITÉ -

Ass-nni n sebt, 28 deg duǧember 2019, i d-yella yiwen usarag ɣef uktazal n tira ɣer unelmad i d-yewwi Mass Ali Bekhti i yellan yakan d aselmad n tmaziɣt uqbel ad yawi tastaɣt. Yella-d waya deg uɣerbaz alemmas Babouche Said n temdint n Tizi Uzzu, s lmendad n umaṣwaḍ n tmaziɣt Abdellah Arkoub. Sdat n wazal n 30 n yiselmden i d-yusan deg yal tama n temnaḍt n Tizi Uzzu, yezzi wawal s umata ɣef wuguren i d-ttmagaren yiselmaden deg unnar lawan n useɣti n tira n yinelmden. Neɣ anta tarrayt i iwulmen deg useɣti n tira n yinelmaden i wakken ur d-ttuɣalent ara tuccḍiwin iɛeddan yakan akked usnerni n tzemmar n unelmad deg uḥric-agi n tira ? Ɣef waya, i iwala dɣa Mass Bekhti d akken tarasta-agi i seqdacen yiselmaden akka tura deg useɣti n ufares s tira, ur twulem ara imi «Ur d-tettak ara igemmaḍ igerrzen», i d-yenna. Ikemmel yesteqsa «Imi ulac lfayda deg-s, i wacuɣer tettkemmilem deg yis-s ?».

- PUBLICITÉ -

Ɣef wakken i d-wekkden yiselmaden i iḥeḍren deg usarag-agi, aseɣti irezzu s waṭas kan tuccḍiwin n tjerrumt, taseftit akked tirawalt. Ayen i iɛeggben tikwal tiktiwin akked tenfaliyin n yinelmaden imi « ttkukrun ad arun s tuccḍiwin xas ma lhant tenfaliyin-nsen». I wakken ad tennerni tira n unelmad, «ilaq ad yaru war akukru, maɛlic ma yecceḍ. U ilaq ad yaru ɣef wayen yebɣa, mačči ɣef wayen ara yettuḥettmen fell-as», i d-yerna deg wawal-is Mass Bekhti. Ɣef wanect-a i iwelleh iselmaden i wakken ad fken azal i tira deg wahil aɣurbiz. «I wakken ad yessin unelmad ad yaru, ilaq ad yettaru yal tikkelt. Ala abrid-a i d tifrat», i asen-yenna. Acku, ɣef leḥasab-is, «tamsalt n tira, d tamsalt n tzemmar mačči n tmussni», acku tamukrist d ta : ma tzemreḍ ad taruḍ, mačči ma tesneḍ ad taruḍ ! Akka dɣa i d-yewwi awal ɣef umgarad yellan gar uselmed s yiswi akked uselmed s tzemmar.

Ɣer taggara, yesumer-d Mass Bekhti yiwet n trasta n useɣti n tira anda i iweṣṣa iselmaden i wakken ad sseɣtayen yinelmaden tuccḍiwin-nsen s nnuba, yiwet, yiwet, mačči ɣef yiwet n tikkelt. Am wakken ur ilaq ara kan ad ttwalin ɣer wayen yessexser unelmad «Ilaq ad tgem azal ugar i wayen yessen unelmad, mačči ad t-tettqassam ɣef tuccḍiwin-is. Ilaq ad nẓer ilemmed ula s tuccḍiwin-agi», i yessuli umsarag timlilit-is anda i mmsefhamen ad kemmlen askasi deg tansa ara d-slalen deg internet.

Hocine Moula

- PUBLICITÉ -