Accueil Tamazight Ass n usileɣ n yiselmaden ɣef tsebḍuyin tiɣurbizin

Tizi Uzzu : Ass n usileɣ n yiselmaden ɣef tsebḍuyin tiɣurbizin

33
- PUBLICITÉ -

Tella-d ass-nni n larebɛa, 25 deg waggur n cutember 2019, yiwet temlilit n usileɣ i yiselmaden n tutlayt tamaziɣt i yesɣaren deg tesnawiyin yellan deg dayrat-agi: Tizi Ɣennif, Dreɛ Lmizan, Mɛatqa, Dreɛ Ben Xedda, ɣer tama n yiselmaden i yessɣaren deg 5 n tesnawiyin-a yellan di dayra n Tizi Uzzu. Tannant-agi n usileɣ n yiselmaden-agi teɛna tamsalt n tsebḍuyin tiɣurbizin. Tella-d sɣur umaswaḍ-nsen n tmaziɣt Mass Ḍrif Ḥassan s tallelt n Mass Ḥemmum Lyas, aselmad n tesnawit. Deg tesnawit n Fetḥi Saɛid n Dreɛ Ben Xedda, i d-yella wass-agi n usileɣ amenzu i useggas-agi aɣurbiz 2019-2020. Tebda temlilit-agi ɣef 09h00 n ssbeḥ, tekfa ɣef 15h00 n tmeddit. Yella-d deg-s wawal ɣef tfarayin (progressions) tiɣurbizin n useggas amenzu, wis sin akked wis kraḍ n tesnawit. Maca yezzi aṭas wawal ɣef tsebḍut n useggas wis sin n tesnawit, imi deg-s i d-yella ubeddel deg wahil s usekcem n umezgun.

- PUBLICITÉ -

Dɣa, ifures Mass Ḍrif d Mass Ḥemmum tagnit, segzan-d ugar ɣef tewsit-agi n tsekla i d-gren deg wahil n useggas wis sin. Fkan-d iwellihen d wamek i ilaq ad yili uselmed-ines daɣel n tneɣrit ɣer tama n tukci n wallalen i izemren ad ɛiwnen iselmaden ara t-iseɣren, imi i tikkelt tamezwarut i t-id-gren. Tettunefk diɣ tegnit i yiselmaden-agi i uskasi d usumer n wayen walan ilaq, imi d nutni i yellan deg unnar, ẓran d acu i iwulmen i yinelmaden-sen d wacu ur nwulem ara. Ma deg tmeddit n wass, yella-d ufraq n yiselmaden-agi d igrawen. Yal agraw yessumer-d iferdisen n tutlayt i iwulmen i yisenfaren-a yellan deg tsebḍuyin-agi tiɣurbizin, ɣer tama n wayen i d asen-d-yettunefken sɣur umaṣwaḍ. Ad d-nesmekti kan belli, d timlilit i ḥedren ugar n 50 n yiselmaden n tmaziɣt, am wakken daɣen i t-id-iwekked Mass Ḍrif, ad d-ilint temliliyin n usileɣ sya ɣer sdat, i wakken ad yili uḍfar-nsen d uwelleh-nsen ɣef kra yellan d amaynut.

A. A.

- PUBLICITÉ -