Iḍelli n lḥed 16 yunyu 2019, i yebda ukayad n taggara n ulmud asniwi, yettwassnen s yisem n BAC i useggas-agi aɣurbiz 2018/2019.
D win ara yeddun ɣef teɣzi n 05 wussan, imi yebda iḍelli n lḥed 16 yunyu 2019, ad yekfu ass n lexmis 20 yunyu-agi ideg nella. Ma deg wayen yerzan amḍan n ukayad-agi n taggara n uswir n tesnawit (BAC), sɛeddayen-t wazal n 18 331 n yisnawiyen, yettwaferqen ɣef 70 n wammasen n yikayaden.
Ma nger tamawt ɣer umḍan-agi, ad t-naf iṣubb cwiṭ ɣef useggas iɛeddan s wazal n 688 n yinelmaden imi ilindi azal 19 019 i t-isɛeddan. Ilaq ad d-nini belli wigi ijerden iman-nsen ɣer ukayad n BAC, llan deg-sen 176 d inelmaden iɣurbizen (yeqqaren deg tesnawiyin tusligin), llan wazal n 5 906 n yinelmaden imunan. Ma d ayen i d-yeqqimen d inelmaden iɣurbizen deg yiɣerbazen n uzayez (ddula). Mbeɛd, ass amenzu n usɛeddi n ukayad-agi aɣurbiz aneggaru, i d-yellan di tegnatin yelhan, yetturaǧu ad ikemmel kan akka.
Iɛedda akken iwata ukayad n BEM
Iberreḥ-d unemhal n usegmi d usedwel n lwilaya n Tizi Uzzu, Mass Lalaoui Ahmed, i d-yennan belli akayad-agi iɛeddan deg tegnatin igerrzen deg lwilaya n Tizi Uzzu.
Yenna-d diɣ belli deg ddurt-agi ideg nella, ad yebdu useɣti n tferkiwin n yinelmaden, ma d azemz n yigemmaḍ yetturaǧu ad yili sya ar taggara n waggur-agi n yunyu.
Deg tririt-is ɣef usteqsi n usečči n yinemsizewren n ukayad n BEM, yenna-d: “Nekni nhegga merra ttawilat ilaqen, i ukayad-agi. Tanmehla n usegmi n lwilaya-nneɣ, thegga imeki i yal anelmad i yesɛeddan, maca yuzel wawal ɣef taluft-agi n tuččit n kra n yinelmaden, nekk ad iniɣ d imawlan n yinelmaden i yettawin arraw-nsen ad ččen deg berra. Deg ddeqs n wammasen n usɛeddi, teqqim tgella akkenni”.
I usmekti kan, yella-d usɛeddi n ukayad-agi n BEM, sɣur 14 327 n yinelmaden, yettwaferqen ɣef 51 n wulmisen n yikayaden. Gar-asen 620 d inelmaden iɣurbizen, yeqqaren deg yiɣerbazen usligen, llan daɣen wazal n 702 d inelmaden imunan, ma d ayen i d-yeqqimen d inelmaden iɣurbizen deg yiɣerbazen n uzayez. Llan-d ɣef lmendad-nsen 3 530 n yixeddamen n uḥric n usegmi.
Gh. A.