Tella-d temsikent n teklut n Mass Djamel Hoceini deg Uxxam n yidles Mulud Mɛemmeri, ɣef teɣzi n ddurt seg 25 ar 31 deg yennayer 2020. D timsikent anda i d-yewwin leqdic n umẓawan/amsuneɣ ɣef tlata n yisental igejdanen. D tamuɣli-s deg wayen yettwali, am wakken yeqqar netta s timmad-is ‘’Deg usuneɣ-iw, ttbeddileɣ ayen yesseḥzanen s wayen yessefraḥen.
Ihi, ɣef teɣzi n ddurt kamel, walan wid i d-yerzan ɣer Uxxam n yidles Mulud Mɛemmeri aṭas n tfelwiyin n teklut n Djamel Hoceini i d-yesunɣen tamuɣli-s ɣef ugama akked twennaḍt. Mmalent-d tfelwiyin imekwan iqdimen i imechuren deg temdint n Tizi Uzzu, tudrin akked yixxamen n leqbayel. Ma d asentel aneggaru, yewwi-d ɣef ugama akked twennaḍt. Imi yella yesddukkel taklut akked uẓawan deg tudert-is, ihi yerna ciṭ n cbaḥa i temsikent-is imi iga assaɣ gar tmesliwt akked uwali s uẓawan i d-yessekles ɣef demma n waya.
Ɣef waya dɣa, yenna-aɣ-d : ‘’Tteɛraḍeɣ ad sunɣeɣ imesla u ad cnuɣ initen’’. Ilul Djamel Hoceini deg useggas 1969 deg Yilulen Umalu, yesɛa Magister n uẓawan i d-yewwi deg Lezzayer tamanaɣt, ɣas ulamma yeḍfer deg tazwara ayen-nniḍen deg tesdawit n Tizi Uzzu (Wed Ɛisi). Yelmed taklut i yiman-is, acu kan aṭas i as-yefkan afus n tallelt ɣef teɣzi n umecwar-is.
H. M.