Zik-nni, yella yiwen ugellid, d bab n lḥikma, yekseb tamussni. Yesεa yiwen mmi-s, ittuṛebba s lεezz, armi yewweḍ d ilemẓi. Yiwet n tikkelt, yenna-as: «A mmi tura aql-ik d argaz, ilaq ad txedmeḍ ». Mmi-s:
-A baba acu ara xedmeγ?
-A mmi ayen ara ak-d-yawin asurdi.
-A baba acu akka ara d-teqqareḍ?
-Mmi-s n ugellid ad yexdem γer medden, εni xussen-aγ yidrimen?
-Ala a mmi, lxudma d tacrift, ttif frank n tidi-k wala amelyun n wiyaḍ. Teggra-d γer medden, ulac wi yellan γer yiman-is, ula d nekk d agellid γer medden, lemmer ulac-iten ur ttiliγ ara d agellid.
Tenṭeq-d yemma-s: « Ay argaz ur qbileγ mmi ad t-sxedmen medden. Ma tebγiḍ ad ixdem, ad ixdem γur-k, yecbeḥ.
Baba-s: « Susem a tameṭṭut, wagi d ccγel-iw, mi ijeṛṛeb lxudma γer medden, imir ad yexdem γur-i, qqaren yimussnawen: » Tannumi d ṭṭbiεa tis snat « . Bγiγ mmi ad yaγ tannuni d lxudma ». Asmi yeṭṭef ugellid di ṛṛay-is, yeqbel uqcic ad yexdem. Iruḥ, tefka-as-d yemma-s asurdi, mi i d-tewweḍ tmeddit, yekcem-d baba-s:
-A mmi txedmed?
-Xedmeγ a baba.
-Acḥal i d-tewwid?
-Wwiγ-d asurdi.
-Zzi-d ziγ ad waliγ asurdi-agi.
Ifka-as-t uqcic. Mi yeṭṭef baba-s asurdi-nni, yenna-as: « Awah! Asurdi-agi ad t-ḍeggreγ ɣer lebḥer si ṭṭaq-agi. Iḍegger-it, aqcic yettmuqqul. Azekka-nni kifkif. Yiwet n tikkelt, yekker-d uqcic, iruḥ γer uḥeddad yenna-as: « Bγiγ ad xedmeγ γur-k ». Aḥeddad, yefhem tamsalt, yenna-as: « Iẓra baba-k »?. Yerra-as-d uqcic: « D netta i yebγan ad xedmeγ ». Syin yeqqbel uḥeddad. Yebda uqcic axeddim s laεtab d tidi. Tameddit, yewwi-d asurdi n tidi-s, yekcem γer baba-s, yenna-as: « A baba, aql-i xedmeγ, a-t-an frank ».
Yeṭṭef baba-s frank-nni, iruḥ ad yelli ṭṭaq akken ad t-id-iḍegger γer lebḥer. Yebda yettru uqcic, yenna-as: « Ttxil-k a baba ur ṭeggir ara laεtab-iw, si ṣṣbeḥ nekk ttqabaleγ times d wuzzal fell-as ». Yuγal baba-s, yefhem belli s tidet mmi-s yexdem, yenna-as: « A mmi, acuγer frank n yiḍelli d win n seldiḍelli, ur tecliεeḍ ara mi ten-ḍeggreγ? ». Yessusem uqcic, yefhem tamsalt akken ilaq. Yenna-as baba-s: « Tura a mmi, teẓriḍ acu swan yiṣurdiyen, zemreγ ad ak-sxedmeγ γur-i. Ttekleγ ur txelluḍ ara baba-k ».
Qqaren: « Ma fkiγ-ak kilu n sserdin seččeγ-ak yiwen wass, ma slemdeγ-ak amek ara tseggdeḍ, seččayeγ-k yal ass ».
Yahia Yanes.