Accueil Tamazight «Au nom de ma parole»/ «D awal-iw i d isem-iw», d ammud...

Ajdid deg ccna

«Au nom de ma parole»/ «D awal-iw i d isem-iw», d ammud n tmedyazt n Anissa Mohammedi

62

Yerna-d udlis-nniḍen i d-yeffɣen d amaynut ɣer tsekla n tmaziɣt. D ammud n tmedyazt n Massa Anissa Mohammedi ara d-yernun abaɣur-is i tsekla yuran.

Ammud-a tefka-as tmeskart isem «Au nom de ma parole», d isefra i tura s tutlayt tafransist. Maca akken ara yesɛu assaɣ akked tutlayt-is n tyemmat, iga-as umyaru amedyaz Ḥusin Luni tasuqilt ɣer tmaziɣt s usentel n «D awal-iw i d isem-iw».

D tiẓrigin Imru i d-yessuffɣen ammud-a, ma d tugna n wunuɣ n sufella, d Farid Mammeri i tt-igan. Yettnuzu udlis-a deg temkerḍiyin s ssuma n 300 idinaren. At-a-n deg temkerḍiyin n temdint n Tizi Wezzu d Lezzayer tamanaɣt, syin ad yettwasuzer deg tamiwin-nniḍen.

Anissa Mohammedi d tamedyazt taqbaylit, tlul di Lezzayer tamanaɣt, tettidir gar tmurt n Fransa d tmurt n Lezzayer, tewwi aṭas n warrazen akken daɣen i tettekki deg tfaskiwin yal mi ara tesɛu tagnit. Tumer aṭas s umaynut-a i d-tessuffeɣ, tenna-d “Tanemmirt i wid d tid i yi-yesbeɣsen, i yi-d-yefkan afud, tanemmirt ɣef tamawin-nwen n tegmat i yi-d-yernan tabɣest. Wagi d leqdic n wacḥal d akud.

Afaris-iw yettwasuqel ɣer kra n tutlayin, maca tasuqilt-is ɣer tutlayt-iw tayemmat yefka-iyi aḥulfu lqayen di tmurt-iw, acku zgiɣ ttarguɣ melmi ara d-rnuɣ tablaḍt-iw i lebni n tutlayt-nneɣ ”.
Khaled Achoui