Azwel n yiseɣrez aneggaru n Buǧemɛa Agraw d « Ur i yi-ttqelliq ara ». Ugar n yiwet s uẓawan kan, ad naf deg-s merra-merra 7 n tezlatin-a: « Eǧǧ-iyi trankil », « Tiɛuggent d nniya », « Cciṭan », « Am rrwaḥ n Lḥesnawi », « Izid wurrif », « Ahat ur nesfa ara », « Kfan yirgazen ». Nezmer ad d-nini mi ara isell yiwen i tḥawact n tezlatin i d-yusan deg-s, ahat ad as-yefk azwel-nniḍen. Acku deg umaynut-a, akken nessen Buǧemɛa Agraw s tezlit tamḥaddit, ttwasqerdcent aṭas n tlufa i yerzan Aqbayli, idles d tutlayt. Dɣa, yewwi-d unaẓur aṭas n tmuɣliwin n usendeh ɣef taluft n Umaziɣ s umata d yiwellihen i tmetti d yilemẓiyen n wass-a. Amedya d tizlit ideg yeqqar: «Ttwaliɣ deg yir zzman, waqila ur as-d-ggrin wussan, i tjaddit-nni.
Anda-ten lfahmin wid yeɣran, teǧǧa-aɣ neɣ d nekni i tt-yeǧǧan, teqbaylit-nni (…)». Ula d taluft n tudert n umdan, iga fell-as tizlit iwumi yefka azwel “Cciṭan”. Yesmekta-d unaẓur s uẓawan d yimeslayen kra n tedyanin i ixeddem bu sin n yiḍarren. Akken yeqqar di tsetna (refrain): « Win ak-yennan yella cciṭan, amek isem-is s teqbaylit. Ɣas init-id anwa i t-yeẓran, ma yesɛa axxam di ddunit. Anwa i ijehlen yeɛsan? d amdan (…)». Ur ibeɛɛed ara buhan seg usentel-a, ɣas ma mačči d akemmel n tezlit, yewwi-d mmi-s n Semɛun awal tikkelt-a ɣef taluft n tudert tugart-tugart d uqbayli, imi yeqqar deg tezlit-nniḍen: « Bɣiɣ yewwas ad ruḥeɣ, s anda ur d-yuɣal yiwen. Lukan zemreɣ ad afgeɣ, itran ad awḍeɣ ɣur-sen. Tamurt n lxali ad tt-kecmeɣ, ad leḥḥuɣ siwa ma yella wwḍeɣ, anda ulac Izzayriyen, yir Leqbayel d Waɛraben».
M. K.