Accueil Tamazight ‘’ Axeddim-a, ad d-yeglu s kra n ubaɣur meqqren i leqdic-nniḍen ara...

Mohend Belkacem, d ajenyur n tsenselkimt, d amsideg

‘’ Axeddim-a, ad d-yeglu s kra n ubaɣur meqqren i leqdic-nniḍen ara iḍerrun akka tura deg umaḍal umḍin’’

259

Mohend Belkacem, d aɛeggal deg tesmilt n uheggi n umawal n tedbelt. Nesteqsa-t ɣef ubaɣur ara d-yernu usmuzzeɣ n twennaḍt tadeblant, yenna-d :

Taseqqamut n uheggi n umawal adeblan, tetthiggi-d leqdic n usmuzzeɣ deg twennaḍt tadeblant. Maca, aya ad iḥaz daɣen tawennaḍt di beṛṛa am yigalisen i irefden ismawen n tedbelt. D ayen ara imudden tallelt i tutlayt akken ad tazzel gar medden ama deg uxeddim neɣ gar yimdanen ticki qqaren-d ismawen n yigalisen i yersen sdat n tuddsiwin, tikebbaniyin, ixxamen n yilmeẓyen, n yidles, inarayen, neɣ imeẓla…atg, ara naf deg yimeḍqan-a. Tamsal n usmuzzeɣ mačči d ayen fessusen imi tcudd aṭas ɣer taɣult n tesnawalt. Anadi neɣ asnulfu n wawalen ɣur-s ilugan-is. Ɣef waya, i tessawel tesqamut-a i yimussnawen d yiselmaden n tmaziɣt. Leqdic ilaq ad d-yeffeɣ seg unnar n timuɣnest ɣer unnar n tussna.

Si tama-nniḍen, axeddim-a ad d-yeglu s kra n ubaɣur meqqren i leqdic-nniḍen ara iḍerrun akka tura deg umaḍal umḍin. Tirebbaɛ n usideg i yekkren i tmerna n teqbaylit ɣer tkarḍa tamaḍalant tillellit(cartographie mondiale libre) OpenStreetMap, ad izmiren ad sqedcen awalen-a ɣer tama n yismawen n tuddar, isaffen, iberdan,…akken azekka ad naf taqbaylit deg wallalen am GPS, ladɣa akka tura imi yezmer kra n wagguren d asawen, ad nernu daɣen taɣect taqbayit. Ittusemma, amdan ad yizmir ad isexdem GPS s teqbaylit xersum di tazwara di tmurt n Leqbayel. Ass-a, tuget n yimdanen, seqdacen allalen atraren i yesseqdacen titiknulujiyin timaynutin am uselkim (Ordinateurs), tiliɣriyin tuḥricin (Téléphone intelligents), tifelwiyin n uselkem (tablettes)…atg. Allalen-a, mazal ur tefti ara deg-sen aṭas teqbaylit. Imdanen, ticki seqdacen allalen-a, ttafen deg-sen tutlayin tibeṛṛaniyin. D ayen ara d-yawin lmaḍerra meqqren i teqbaylit labeɛda i warrac ara d-yettenkkaren.

Ɣef waya, acḥal d tikkelt ara d-neggar tiɣri i yimdanen akken ad suzuren s ṭaqa axeddim-nsen deg Internet, ad d-beṭṭun tiktiwin d tmussniwin-nsen i yilmeẓyen ara iqeddcen deg unnar n usideg n yifecka (localisation des outils) neɣ deg unnar n usemsel awurman n tutlayt (traitement automatique des langues). Sin-a n yiḥricen ineggura, ad ǧǧen i yimdanen ad sqedcen imeẓla (service) ama deg uselkim neɣ deg Internet s tutlayt-nsen tayemmat war ma terra-ten tmara ad smersen tutlayin tibeṛṛaniyin. Deg taggara, ad snemmreɣ Aɣmis n Yimaziɣen i yettilin yal tikkelt deg unnar akken ad d-yawi isallen i icudden ɣer leqdic yezdin i tutlayt taqbaylit. Ad snemmreɣ daɣen Mass Rabia Farid i yellan ɣef uqerru n tseqqamutt n usmuzzeɣ n twennaḍt tadeblant deg ugezdu n Tizi Uzzu, imi i aɣ-d-yefka tagnit akken ad d-nmudd ayen nessen, neɣ ad d-nerfed tamussni seg yimussnawen yellan deg unnar-a. Nessaram ad d-ḍerrunt temliliyin am tigi s waṭas.

Hocine Moula