Iberreḥ-d uneɣlaf n usegmi aɣelnaw Mass Belabed Abdelhakim d akken 656 n yisɣuren n uselmed deg wakal n tmurt ara yellin tiwwura-nsen seg wass amezwaru n tuɣalin s aɣerbaz. Seldazekka n larebɛa, 04 cutember 2019, ad uɣalen yinelmaden s aɣerbaz, i lmend n useggas aɣurbiz 2019/2020. Iɣezrbazen-agi ara yellin ass larebɛa, ttwaferqen akka: 426 n yiɣerbazen imenza, 137 n yiɣerbazen ilemmasen akked 93 n tesnawiyin. Am wakken daɣen ara d-tili tullya n ddeqs n tnawaliyin tiɣurbizen deg waṭas n tamiwin.
Ma ɣef temsalt n uselmed, iwekked-d uneɣlaf-agi belli ad yili usexdem n yisdawanen i d-yeffɣen seg yiɣerbazen unnigen n yiselmaden gar useggas n 2016-2019, akked usali n wiyaḍ seg wumuɣen n uraǧu, ara ikemmlen alamma d taggara n useggas-a. Dɣa i lmend n waya, yella-d uftaḥ n wazal 8 041 n yimukan n uxeddim i yiselmaden imaynuten, ara yilin seg wass-a deg yiɣerbazen. Am wakken diɣ i d-yella usnerni n wuṭṭun n usegrer (encadrement), ama s yinemhalen, ama s yimagazen imuta neɣ yixeddamen-nniḍen, i d-irebḥen temsizzelt n uxeddim, i d-yellan deg wussan iɛeddan. Ma si tama n umaynut deg wayen yerzan idlisen iɣurbizen swayes qqaren warrac, wwḍen s iɣerbazen deg lawan-nsen, ad ttwaferqen seg wass n larebɛa d tasawent.
22 n yidlisen iɣurbizen imaynuten, gar wid yettwabeddlen d wid i d-yernan. Idlisen-agi, ḥuzan kan aswir amenzu s 11 n yidlisen ijdiden akked 11 wiyaḍ, rzan aɣerbaz alemmas, gar-asen adlis n tmaziɣt n useggas wis ukkuẓ n ulmud alemmas. Idlisen-agi d wid n tsuta tis snat, ideg i d-yellan uɛiwed n tmuɣli deg-sen.
Ugar n 9 n yimelyan n yinelmaden ara yuɣalen deg wakal aɣelnaw
Ugar 9 n yimelyan n yinelmaden ara yuɣalen s aɣerbaz deg wakal n tmurt i useggas-agi aɣurbiz amaynut, i yettwaferqen ɣef 28 007 n yiɣerbazen yellan deg tmurt, ɣer tama n tzeɣwa n usegmi i yettwaheggan ad ilint di ttiɛad, i uqabel n wugur n taččart n tesmilin n tɣuri. Ulamma yennerna s waṭas wuṭṭun n yiɣerbazen, imi deg useggas iɛeddan ala 27 351 i yellan, maca aseggas-a yella-d ureqqeɛ d tmerna n wazal n 656 n yiɣerbazen imaynuten. Dayen ahat ara yesneqsen amacemma taččart n tneɣriyin.
D ugar-agi i d-yettmaggar s waṭas uḥric n usegmi di tmurt, di yal tuɣalin taɣurbizt, imi mazal isɣuren n tmurt ur d-ṭṭqaddan ara i wuṭṭun n yinelmaden i yettalin yal aseggas. Iberreḥ-d uneɣlaf n usegmi aɣelnaw Mass Belabed, ussan iɛeddan s tḥawact taɣelnawt n tuɣalin, yenna-d: ” Yetturaǧǧu ad uɣalen wazal n 9 110 000 n yinelmaden ɣer tzeɣwa n tɣuri seg wass n larebɛa d tasawent”. Uṭṭun-agi, iṣub ɣef useggas iɛeddan, imi ilindi yewweḍ ɣer 9 269 892. Azal n 155 00 n yinelmaden ara ikecmen i tikkelt tamenzut s aɣerbaz. Ad tili temsirt tamezwarut, ara d-yilin seg yiwen gar yiɣerbazen n tmurt, ad tili tesɛa assaɣ d wayen iḍerrun deg tmurt.
Adaoun Abdelghani