Ɣas ma di lɣerba i yettidir, d lɣerba i t-id-iṣaḥen neɣ ahat i t-iselken akken ad ikemmel tameddurt-is deg-s, ɣas yebɛed ɣef tmurt d leḥbab, maca annect-a merra ur t-yeǧǧi ara ad yegzem assaɣen-is d wid-is. Amar Maouchi, yella yettaru, yesmedyiz s tmaziɣt asmi kan i d-yekfa taɣuri-s tasdawant. Mi i d-yufa iman-is di tmura n medden, lebɛada-nni ur as-tegzim assaɣen akken ad yessefru s tutlayt-is, ad ikemmel tira-ines ugar n wakken i tt-yebda, yenna-aɣ-d ɣef waya «Akken i yella deg wawal, ɣas yeffeɣ umdan tiẓgi, tiẓgi ur teffiɣ aqerru-s, d tamedyazt i aɣ-d-yettarran ɣer din, d nettat i aɣ-d-yettaken afud ad nkemmel da».
Ɣur-s yakan ukkuẓ (4) n yidlisen s tmaziɣt, tikkelt-a yuɣal-aɣ-d s wayeḍ d amaynut i d-yeffɣen kan deg wussan-a yezrin ɣer teẓrigin Loulou.com deg internet, d ammud n tmedyazt i wumi yefka azwel «Azemni».
Tamedyazt s wudem anmeglan
D yiwen wammud anesbaɣur yettqudduren d ccbaḥa d telqey n teqbaylit, ad t-naf yessefra s teqbaylit kan, mačči s tmaziɣt am wakken qqaren, i as-yura uselmad n tsekla di tseddawit Kamal Bouamara deg tezwert n wammud-a. Ammud n tikkelt-a, imi d-nenna d amesbaɣur, armi i yella akken, mačči kan deg umḍan n yisefra yewwḍen ɣer 117 d asefru, yebḍan ɣef 11 n yiḥricen, gar-asen ad d-nebder «Rrbeḥ d lexsara, Temẓi d temɣer, Ṣṣeḥḥa d waṭṭan, Nneyya n zik d tḥerci n tura…», maca d amesbaɣur daɣen deg tutlayt i yessemres, ɣas akken d ilemẓi n 33 n yiseggasen kan deg usemmud-is, maca win ara yadfen ɣef tmedyazt-is, ad yadef ɣer teqbaylit n yimɣaren izemniyen, widak-nni yecban timkerḍiyin, ɣur-sen i yemmal umedyaz A. Maouchi neɣ ɣur-sen i d-yugem.
Ammud n tikkelt-a “Azemni”, akka tura yettnuzu deg le site Loulou.com, deg tmuran Canada, Marikan d Lurup, ur yettɛeṭṭil ara ad t-id-yessekcem ɣer tmurt n Lezzayer, ma tella teẓrigt i yebɣan ad t-id-tessuffeɣ, yerna ad as-yeg ssuma rxisen, akken daɣen ara t-imud baṭel i yimedyazen d yinelmaden n tseddawit deg tmurt n leqbayel. Ayen daɣen iɣef nerra lwelha deg tmedyazt-is, d akken qrib merra isefra-ines segmi yebda yessefruy, ad ten-naf s talɣa tametẓit (3 3 3), neɣ aab aab aab, annect-a yesmekta-aɣ-id amedyaz ameqqran n teqbaylit n tallit taqburt Si Muḥ Umḥend, aserwes-a ur yelli ara deg-s ccek, imi ma nmuqel, ama ɣer talɣa n usefru, ama ɣer ugbur-ines, neɣ ma neẓra belli aṭas i as-yessawalen Si Muḥ Umḥend amecṭuḥ segmi yebda tamedyazt, akken i aɣ-t-id-yenna. Amedyaz-a imi i yedder kra n tlufa u yesla neɣ iwala tiyaḍ, d aya i t-yeǧǧan ad tent-id-yejmeɛ deg wammud-a «Azemni».
D tilufa i iɛegben timetti tineggura-a, imi yuget lexdeɛ, tismin, maḥyaf, iɣil d leḥqer. Ɣef waya ahat i iwala d lwaǧeb ad tent-id-yerr d isefra s teqbaylit yettwaferẓen d tmeɣrut ara yeǧǧen win ara ten-yeɣren neɣ ara sen-yeslen ad t-zzuznen, ɣas ma yella d awal kan d yinnan. A.Maouchi yefren ad aɣ-d-yesken tamedyazt-is s wudem anmeglan, acku ayen yakk yelhan di tudert seg tama, yettqabal-it-id wayen ur nelhi seg tama-nniḍen.
Tameddurt-is s tewzel
Amar Maouchi, d ilemẓi n 33 n yiseggasen, ilul deg useggas n 1987. Taddart-is ideg i d-yekker d Tizi Lqern, asun n Udekkar. Ɣur-s agerdas deg tutlayt tafransist i d-yewwi seg tesdawit n Bgayet, maca imal u iḥemmel ad yaru s tutlayt n tyemmat-ines. Yettidir imir-a deg tmurt n Marikan seg useggas n 2016. Gar wayen yura, ad naf, (Tasusmi-k, ungal 2015), (“Tiliwa n tayri” akked yiwen CD “Yir aṭṭan, isefra 2016), (Temẓi tawessart, isefra 2017).
Khaled Achoui