S rbeḥ-agi-ines sdat n terbaɛt Horoya Conakry, tettedu srid JSK ɣer uḥric i d-iteddun n telɣuɣa n Tefriqt.
Sdat n waṭas n yimferǧen i d-yerzan ass-nni n sebt, 14 deg cutember 2019, ɣer unnar n umenzu n unbir n temdint n Tizi Uzzu, tessaweḍ tarbaɛt n Yilmeẓyen n leqbayel i wakken ad terbeḥ sin (2) n yiswiyen ɣer ulac HAConakry. Iswiyen i d-yewwi yilemẓi ifazen Banouh i yuraren akken iwata timlilit armi d ddqiqa tis 84’. Xas ulamma aṭas i d-yewwten deg-s uqbe ad t-walin yetturar deg unnar, meɛna ibeggen-d belli yezmer ad d-yawi ugar i terbaɛt n Yilmeẓyen n leqbayel.
Dayen i yeḍran dɣa sendiḍelli n sebt. Tekcem terbaɛt n JSK s annar s lebɣi meqqren i wakken ad terbeḥ timlilit s waṭas n yiswiyen ayen ara yessishilen timlilit n tuɣalin ɣer Conakry, acu mačči dayen isehlen sdat n terbaɛt n HAC i yetturaren ula d nettat s lebɣi ameqqran. Xas ulamma aṭas n tegnatin i as-iruḥen I terbaɛt n JSK i wakken ad d-tawi iswiyen, ladɣa deg ddqayeq 2’, 4’, 18’, 28’, 44’, sɣur Addadi, Banouh, Souyad d wiyaḍ, meɛna armi d ddqiqa tis 51’ i yessekcem Banouh ddabex ɣer daxel ucebbak n Moussa Camara, aɛessas n terbaɛt n HAConakry.
Aya, ur yessefcil ara imyurar n HAC, imi ɛerḍen ad d-rren ttar kra n ddqayeq kan ɣef yiswi amezwaru n JSK, acu kan tarbaɛt n Yilmeẓyen n leqbayel i yernan iswi-nniḍen. Iswi i d-yewwi dima Banouh deg ddqiqa tis 66’. S sin n yiswiyen ɣer ulac i tkemmel temlilit armi d taggara-s. Gar wid yellan deg temlilit-agi, nezmer ad d-nader Sendjak. Am wakken daɣen i truḥ trisiti uqbel ad yebdu uḥric wis sin n temlilit, acu kan tuɣal-d snat n ddqayeq kan.
Hocine Moula