Am wakken yettuɛeggen, ddurt iɛeddan, i bdan lecɣal n lebni n sin yisebdaden n usmekti, yiwen i uɣewway Matoub Lounès wayeḍ i ugrawliw Imache Amar.
Sin-agi n yirgazen i yefkan tarwiḥt-nsen d asfel ɣef tmurt, yiwen i tegrawla tazzayrit wayeḍ i umennuɣ amaziɣ. Mbeɛd, mi d-yella usersi n tmeqqunt n yijeǧǧigen ɣef uẓekka n umeɣras, yellan deffir n tlalit n Yitri n Tefriqt n Ugafa (ENA) deg useggas n 1926, wagi d Imache Amar. D tagnit i ḥedren yiɛeggalen n tddukkla Imache Amar d wid n Tesbeddit Matoub Lounès ɣef uqerru-is Malika Matoub, taselwayt n tesbeddt-a, llan diɣ imḍebbren n tɣiwant n At Dwala.
Dinna i d-iberreḥ Mass Fekhar Amar, imḍebber deg tɣiwant n At Dwala s waya : “Am wakken i d asen-nṛeggem i snat n twaculin-agi d yimezdaɣ-nneɣ, yewweḍ wass i nurǧa acḥal-aya. Ass-a (letnayen 08/07/2019), d ass ur necbi wiyaḍ, ad yeqqim deg umezruy n temnaḍt-nneɣ, i yerran tajmilt meqqren i sin yirgazen-is meqqren”. Ikemmel yenna-d: “Aḥric amenzu n usenfar-agi, ad yesqam s wazal n 680 n yimelyan: 380 imelyan, d taɣiwan-nneɣ ara ten-iqablen ma d 300 imelyan-nniḍen d Aseqqamu Aɣerfan n Lwilaya ara ten-iqablen. Ad ttwaxdamen yisebdaden-agi ɛlaḥsab n yilugan igraɣlanen swayes xeddmen isebdaden”.
Beddu n lecɣal n sin n yisebdaden-agi, yella-d i lmend n usmekti n umulli wis 124 n tlalit n Imache Amar, i d-yellan ass n 07 yulyu 1895. Ad d-nesmekti kan belli, aẓru amezwau n lebni-nsen, yettwasers ass-nni n 25 yunyu iɛeddan, i lmend n umulli wis 21 n tmenɣiwt n ucennay Matoub Lounes. Ad d-yili lebni-nsen deg tlemmast n temnaḍt n At Dwala, sdat kan n usɣim n ladayra.
Gh. A.