Seg tqacuct ɛlayen n udrar n Merǧaǧu i yebda ass-nni n acer yezrin uṣewwer n usaru asnegmay n warrat d udellel i lmend n wuraren n yilel agrakal ara d-yilin deg temdint n Wehran deg unebdu n useggas n 2021. Ɛlaḥsab n talɣut i aɣ-d-yewwḍen seg tenmehla tawilayant n yidles, yella-d ufran n udrar n Merǧaǧu deg tazwara, imi ɛlay.
Ɣef waya tugniwin timenza ara d-yettwasneɛten deg usaru-a d ccbaḥa n ucraq d walluy n yiṭij ɣef temdint n Wehran yebhan neɣ akken i as-ssawalen s taɛrabt “Lbahya”. Syin, ad ikemmel uheggi n usaru s lmendad n twilayt ara d-yilin deffir n usenfar-a. Ma d tukci n tedrimt (sponsoring), ad d-yili sɣur agraw n Sonatrac. Leqdic-a, ad ikemmel ihi ɣef teɣzi n ṣa n wussan, deg yidgan yemgaraden i d-yeskanen amezruy lqayen n temdint-a n Wehran, yecban amraḥ n yimrigen, tawenza n lebḥer (front de mer) d leqṣer n Lbay…atg.
Ad kkin deg usali n leqdic-a waṭas n wudmawen idelsanen, inaddalen d yilmeẓyen yettwafernen akken ad d-yili usisen n temdint n Wehran seg xilla n tamiwin. Ad d-nesmekti belli tawilayt-a, tettheggi i teẓrigt-a tis 19 n wuraren n yilel agrakal s tigin n leqdicat meqqren, am tigin n taddart tagrakalt (Village Mediterranéen), d unnar meqqren yettawin ugar n 40 000 n yimferǧen di tama n Belgayed d tzeqqa n waddalen yemxalafen ara d-yekfun i 6 n yigiman akked wammasen n lɛum. Akken daɣen ara d-yili ureqqeɛ d uɛawed n waṭas n yimukan n waddal yellan yakan.
Ad d-ilin daɣ yirmad n ucebbeḥ n yizenqan ara d-yefken tahuski igerrzen i yimerza. Annect-a merra, akken ara iɛeddi u ad iwenneɛ usiher-a anaddal agraɣlan, imi ad d-yeglu s yiseɣ i tmurt ma iɛedda akken iwata. Seg tama-nniḍen, nelqeḍ-d yiwen isali, anda i yetturaǧu ad d-rzun yiɛeggalen n teseqqamut tagraɣlant n wuraren-a n yilel agrakal d inebgawen ɣef temdint n Wehran ass n sem i d-iteddun, akken ad muqlen u ad ẓren s anda ssawḍen lecɣal n uheggi n yidgan-a inaddalen, gar-asen ladɣa taddart tagrakalt d unnar meqqren, imi lecɣal a-ten-an deg taggara, u yetturaǧu ad d-tberreḥ teɣlift n yilmeẓyen d waddal s keffu n leqdic n unnar deg waggur-agi n yebrir sdat-neɣ.
Khaled Achoui