Accueil Tamazight Briruc n Ait Ali Kader

Ajdid deg tira : Briruc n Ait Ali Kader

109
- PUBLICITÉ -

Briruc d isem n yiwet n tmezgunt i d-yessufeɣ s wudem n udlis Ait Ali Kader. Tga unuɣen tnelmadt Hachour Mayles i yesɛan 12 n yiseggasen deg leɛmer-is. Tettmeslay-d tmezgunt-a ɣef tḥerci n Briruc d wamek i d-yeslek yelli-s n ugellid. Aya yeḍra-d imi ɛerḍen yakk yimnayen n tgelda ayen-nni, acu kan ur ssawḍen ara ɣer yiswi.

- PUBLICITÉ -

Syin ihi i iruḥ Briruc, yewwi tajewwaqt-is, la yettcewwiq nnig lɣar n yiwaɣezniyen-nni. Ceṭṭḥen, zhan armi ruḥen deg tnafa. « Briruc, d urẓin, d uḥric, d awudam n zzman aqdim. Yettidir deg tmucaha-nneɣ, daxel n yixxamen-nneɣ. Tikkelt-a, bɣiɣ ad t-id-rreɣ ɣer daxel n tmezgunt », i aɣ-d-yenna Mass Ait Ali.

Ma ɣef tnelmadt i yessunɣen iwudam, ikemmel yenna-d : « D yiwet n teqcict i ilemden taklut azal n 3 n yiseggasen-aya deg Uxxam n yidles Mulud Mɛemmri n Tizi Uzzu. Tekka deg-s 8 n wagguren i wakken i tessuli leqdic n udlis-agi. Leqdic i yi-iɛeǧǧben aṭas, axater tekcem deg tekti n tmezgunt. Tefhem izen-is». Ma ɣef wayen i yessawḍen amyaru ɣer uḥric-agi n warrac imecṭaḥ, iwala d akken «ulac maḍi win i d-yelhan s uḥric-agi n yigerdan, ladɣa, amezgun n yimecṭaḥ.

Ɣef wanect-a, dɣa, i d-heggaɣ tamezgunt-agi. Xedmeɣ-d ula d amnir ara yeslemden amezgun ama i iselmaden, ama i yinelmaden deg uɣerbaz». Amahil am wa, ixus nezzeh deg unnar. Tamezgunt-agi ara d-yeffɣen d adlis deg ussan i d-iteddun, ad tili d allal i yinelmaden akked yiselmaden deg yiɣerbazen. D allal ara sqedcen, ladɣa, deg tmeɣriwin neɣ deg tfaskiwin i d-yettilin ɣef teɣzi n useggas.

Hocine Moula

- PUBLICITÉ -