Mbeɛd mi iɣab azal n sin n yiseggasen ɣef unnar n ccna, ha-t-an yuɣal-d ussan-agi ineggra ucennay ilmeẓi Karim Khelfaoui, mmi-s n taddart n Ait Khelfats di tɣiwant n Ait Aissa Mimoun. Seg useggas n 2016 mi d-yessuffeɣ tasfift-is taneggarut, i wumi isemma “Ur d-yeggri udikel deg uqluj”, ideg llant 10 n tezlatin, yeqqim armi i d-zzin ɛamayen, i d-yessuffeɣ tasfift-is tis mraw d yiwet (11). Ass-nni n larebɛa iɛeddan 17/04/2019, i yewweḍ leɛtab-is ɣer tafat, anda yeṣṣaweḍ ad yesuffeɣ tasfift iɣef yenneɛtab sin n yiseggasen n uxeddim. Uffir, d tasfift tis 11 n ucennay Karim Khelfaoui, ɣer tezrigin “El Vaz” n Tizi Uzzu. Deg-s maraw (10) n tezlatin yeččuren d sser d wawal ḥlawen, zeddigen. Isental igejdanen n snat-agi n tesfifin, cudden deg tuget ɣer tmetti, lḥif, lfiraq, Yefna-k ssber ay ul-iw, Liḥala n tmurt (tasertit), Rran-k d amsil, Uffir…atg. Am wakken, daɣen i d-yewwi amaynut deg tesfift-agi s tezlit-nni tamazrayt (Izem), ideg i d-yettales tadyant-nni i d-yekkan seg yinzi-a: “Izem d Mḥend i t-yenɣan, cciɛa-s d abu Sliman”. Ma azwel n album-agi aneggaru, yekkes-it-id seg tezlit-nni tis 09. Am wakken diɣ i yefka azal meqqren i temsalt n tdukli gar leqbayel deg tesfift-agi, d ayen ara nsell deg tezlit-nni tis 08 “Carwen wulawen”.
26 n yiseggasen n ccna, 11 n tesfifin
Ad nesmekti imeɣriyen-nneɣ s umecwar n ucennay Karim Khelfaoui, imi tura akka ɣur-s 11 n yiḍebsiyen. Amenzu d «Wissen ma ad am-yexdem leḥsan» i d-yeffɣen deg useggas n 1993, wis sin d «Taftilt» i d-yeffɣen deg useggas n 1995, ideg llant 06 n tezlatin. Deg useggas n 1996 yessuffeɣ-d CD wis kraḍ, I wumi isemma : «A tin iyi-yuran deg twenza-w». Aḍebsi wis ukkuẓ «Ibujaden n tayri» yeffeɣ-d deg useggas n 1998. Ma d tasfift tis semmuset «Seqsi iman-ik d acu-k? », d tis seddiset « Ґef zewağ-iw yurez-iyi cekkal », ffeɣent-d deg useggas n 2001.
Ma d tasfift tis saṭ teffeɣ-d deg useggas n 2004, tin-a iwumi isemma «Tayri-w tamezwarut zegleɣ». Aḍebsi wis ṭam «Ay irij», yeffeɣ-d deg useggasn n 2006, ma d wis tẓa «Tazeqqa n lejdud» deg useggas 2009. Ma d tasefift uqbel taneggarut-a, d tinna n 2016, tin-a iwumi iga azwel-a «Ur d-yeggri deg yidikel uqluj».Ɣer taggara, ad d-nesmekti kan belli ma nudder-d isem n ucennay Karim Khelfaoui, ad yezwir s allaɣ-nneɣ uzwel n tesfifit « Wissen ma ad am-yexdem leḥsan», i d-yessufeɣ d tamezwarut. Ma di tizlatin ulamek ur d-nettader tuɣac-agi: “Am wallen tizraraqin”, “Semman-iyi medden sufğeɣ”, “Ay irij”, “A mmi zuɣer-iyi-n deg ufus”, “Tazeqqa n lejdud”… Deg wussan-agi i d-iteddun, ttraǧunt-tt aṭas n tmeɣriwin, imi yesɛa ahil d uzzig deg tmurt n Fransa i lmend n usmeki s tefsut taberkan d tin n yimaziɣen.
A. A.