Teṭṭef tugdi tameqqṛant imezdaɣ n taddart n Wajjiwen, taɣiwant n Draε Lqayed, tadayṛa n Xeṛṛaṭa, imi i d-yettwabeṛṛeḥ yisalli n yiwen n yilemẓi i yenɣan iman-is. Ɣef leḥsab n teɣbalut-nneɣ, tedṛa temsalt ass n ahad, 13 di meɣṛes yezrin. Anda i iεelleq iman-is yiwen n urgaz, seg temrart i yettwaqqnen ɣer ttejṛa. Wagi d (Ɛ.M) i yesεan 47 n yiseggasen di leεmeṛ, i yellan d ababat n ukuẓ n warrac. Ad d-nesmekti d akken argaz-a, laṣel-is seg temnaḍt n Rreḥamin. Ma yella ɣef tmentilt n lmut-is, ur d-tban ara ar ass-a. Seld tuffɣa n yisalli, uzzlen warraw n taddart-a ssawlen i yiɣallen n laman, akked yiqeddacen n Uḥuddu aɣarim. Kra n wakud, leḥqen-d yiǧaḍarmiyin i yebdan imir-n steqsayen wid iḥeḍḍṛen, yerna ḥewwsen deg umkan-nni ma yella kra ara afen. Syinna, fkan-asen ttesriḥ i yiqeddacen n Uḥuddu aɣarim, i t-yessawḍen s tazzla i sbiṭaṛ n Xeṛṛaṭa, i wakken ad xedmen ayen ilaqen. Seg tama n wid yellan dinna, irkeb-iten zzεaf, imi qqaṛen sseba n tmettant-is d iɣeblan deg wacu ttidiren dderya n tmurt-a, d iεewwiqen i ten-yesseɣlayen yal ass ugar.
K. K.