Accueil Tamazight Cebbḥen Wat Yiɣil aɣerbaz-nsen

Aɣbalu

Cebbḥen Wat Yiɣil aɣerbaz-nsen

121

  ‘’Win yebɣan ad yebnu tamurt, yebnu aɣerbaz-is. win yebɣan ad ihudd tamurt yezwir deg uɣerbaz-is’’. S yimeslayen-agi i kkren yimezdaɣ n taddart n Yiɣil Ucekrid deg tɣiwant n Uɣbalu ɣer lebni uɣerbaz-nsen deg usemmiḍ n tɣaltin iεeddan 1 000 lmitrat. D ixeddim uɣur i d-tessawel tddukkla n twennaḍt n taddart-agi akken ad beddlen udem i uɣerbaz Geṛṛuṭ Meẓyan. Liḥala n uɣerbaz ur tessefraḥ ara imi tawwurt n wuzzal tehruri mliḥ deg temnaḍt-agi ideg aḍu d imezgi, yerna ur yeshil ara, qeccṛent, rrẓent, di lawan ideg inelmaden xeddmen isurifen-nsen imezwura deg tira imi ḥwaǧen ad qeεdent tfettusin-nsen. Leḥyuḍ n uɣerbaz iqeccṛen, cemten mačči d kra ɣas inelmaden n uɣerbaz amenzu, ḥemmlen aṭas unuɣen. S waṭas n lebɣi d tezmert i bdan At Yiɣil ixeddim s uqεad n taewwurt n unekcum s aɣerbaz yettwasudin, syin yers fell-as yini aberkan icuban igenni d yitran, itran ara iceεlen deg taṭṭucin n yigerdan mi ara walin kullec d ajdid d ucbiḥ.

Leḥyuḍ ilmawen uqciṛen, cban asaru s ṛṛusum iwumi fkan tudert am Tom et Jerry  i ḥemmlen meṛṛa yigerdan. Einstein yella deg wadeg-agi n tussna akken xeddmen yiwen udlis yeldin deg-s ttreḍqen-d isekkilen s taεrabt, tafrensist d tmaziɣt. Tijeǧǧigin d isekla, llan di ttiεad imi tiddukkla n twennaḍt, txeddem i tezdeg deg yimukan d wallaɣen. Ṭṭwabel yehtutan, ttwaqεadent yerna cebbḥent s uzewwaɣ, aḥcayci d uzegzaw icuban tafsut akken yal ass d tafsut deg ulawen n yinelmaden. Adeg n wučči yettuεawed-as yini-s, yerna rrsent deg-s tugniwin n tgella ɣef leḥyuḍ akken mi terwa tεebbuḍt, ad tebdu tmexmuxt ixeddim. Deg yidurar εlayen ḥarcawen, ǧǧan Wat Yiɣil lecɣal-nsen d twaculin-nsen ɣas d imuṛas ur staεfan ara akken ad fken udem ajdid i uɣerbaz Geṛṛuṭ Meẓyan imi nutni akken uran deg yiwet n teɣmeṛt n uɣerbaz d tawacult iteddun ɣer zdat.

Tigrine Nisma