Yal tamacahut amek i as-ceffun yimdanen, amek i tt-ssawalen seg wa ɣer wa, d wamek i as-ttaken azal. Macahu tellem cahu, Rebbi ad tt-iselhu, ad tt-iɣzif annect n usaru.
Qarren yiwet n tikkelt, uccen yessaweḍ-it llaẓ ɣer yir tagnit, ihi la ileḥḥu ittenduda armi yufa yiwet n tneqlet tekna seg wakken teččuṛ d tibexsisin, llan ula d iḥbuben. Yuɣal, yeffeɣ-it leεqel. Yeqqim la itett armi yebzeg uεebbuḍ-is, yekker ad iruḥ, yezzi ɣer tmeɣrustnni yenna-as: “Ad am-yefk Rebbi ṣṣeḥḥa s tidet, daymi i am-qqaren nneyya n tbukart ittarwen snat n tikkal deg useggas, teččureḍ d lxir.
Iεedda lweqt, yezzi llaẓ ɣef wuccen ageswaḥ, ur yufi d acu ara iger ɣer yimi-s. Am win ara t-id-yesmektin, yerra srid ɣer tneqlet-nni di ccetwa, yaf-itt-in ala isɣaren, acku di tegrest tineqlin iɣelli-asen yifer, gerrint-d d tiɛeryanin degmi i qqaren « Aṭṭas i yezha di lexrif, di ccetwa yedda ɛeryan». Yerfa wuccen seg ur d-yufi ara nnṣib, iḍmeɛ, yezzi ɣer tneqletnni, yenna-as: “D ddɣel-nni i yellan deg wul-im i akem-yeǧǧan akken d taɛeryant”. Awal s lmaεna-s.
Yahia Yanes