Qqarren zzman, tazmert n twacult, tettuγal γer wacḥal n yirgazen tesεa. Acku argaz d netta i yettqabalen aεdaw n beṛṛa, yerna d argaz i yesεan tazmert n yifadden i tetteḥwiğ txeddimt n tmurt, am tkerza d tmegra atg… di lecγwal imxalafen. Ɣef wayagi, dɣa, mi ara ilal uqcic ssiγritent tlawin, zellun akraren, acu kan mi ara d-tlal d teqcict, berrun i wallen-nsen, am wakken s usḥissef. Dγa, ad as-inin i temnifrit “awi-d kan imi tselkeḍ” am wakken d awezγi i d-yeḍran. Akka i d lεada, tettwaḥettem-d si yal tama.
Yiwet n tikkelt, yiwen n urgaz, yesεa ala tullas, yerγa ad yesεu mmi-s, xersum ad d-yeggri yisem-is. Mi terfed tmeṭṭut-is s tadist, yenna-as: “A tameṭṭut, ḥṣu tikkelt-agi ma d tallest i d-tesεiḍ, ad tt-nγeγ wa ad gluγ s uqerru-m neγ muqel anida ara tegreḍ leεmeṛ-im. Tameṭṭut, ur d-tenni awal, tefhem d acu i d-yewwi lḥal, maca mačči d lγerḍ-is, tettru tessusem. Mi d-yewweḍ wass ideg ara terbu, iruḥ urgaz γer lexla am win yugaden, yeqqim s ddaw n tzemmurt yeqqar-as: “A Ṛebbi ttxil-k kullec fell-ak yeshel”.
Ideεεu, armi t-yeḥwes yiḍes, di lemnam n Ṛebbi (targit), iwala yerna γur-s uqcic, yefreḥ, isečč yakk taddart. Iṛebba aqcic-nni armi meqqer, yuγal-as d waγzen ayen akk yekseb, yesenz-it. Yegla ula s uxxam n jeddi-s, ad yeṭṭef si lḥebk ad as-yini, ad i yi-d-tmuddeḍ aya d waya neγ ad gluγ s leεmeṛ-ik. Yuγal yuki-d si tnafa, yefhem targit-nni d acu-tt. Iruḥ-d d tazzla γer uxxam, yessawel-d: “A tameṭṭut d acu i d-tesεiḍ? Tameṭṭut s yimeṭṭawen d lxuf: “D taqcict”. Argaz, yeγli γef tgecrar, yeqqar-as: “Ad ak-ḥemmdeγ ad ak-cekkreγ d kečč i yeẓran d acu ideg yella leṣlaḥ”.
Yahia Yanes