I lmend n usmekti n wass aɣelnaw n umeɣras, yemtawan d zzedmant n Qsenṭina 20 ɣuct 1955 akked temlilit n 20 ɣuct 1956, thegga-d Tenmehla n yidles n Tizi Uzzu ahil d amerkanti i d-yellan d tajmilt i umjahed Si Abdallah Maghni.
Yella-d usmekti-agi ɣef teɣzi n sin wussan, ama deg Uxxam n yidles Mulud Mɛemmeri, ama deg Temkerḍit tagejdant neɣ deg Uxxam n umezgun Kateb Yasin akked Uxxam n ssinima n Tizi Uzzu. Tebda tejmilt-agi, ass-nni n letnayen, 19 ɣuct 2019, deg Uxxam n yidles n Tizi Uzzu, ɣef 10h00 n ssbeḥ. Tella-d tullya tunṣibt n leqdic-agi, s umeslay n tnemhalt n yidles n Tizi Uzzu akked tnagiyin n yimawlan d yimeddukkal n umeɣras-agi.
Syin akin, llint temsikniyin yerzan imuhal d tudert n umjahed-a d yimjuhad-nniḍen. Llant-d diɣ temsikniyin n tugniwin n yimeɣrasen n tegrawla 1954-1962, ɣer tama n tin yidlisen n umezruy akked usenzi s ubuddu n kra n yimura. Ɣef 11h00 n uzal, tettunefk tegnit i tmedyazt tagrawliwt akked ccnawi d yicewwiqen ɣef ṭṭrad azzayri d ucekker n yimeɣrasen, yefkan tudert-nsen d asfel ɣef tmurt-a. Tin ɣur-s, ɣef 14h00 n tmeddit, yella-d uskan n yiwen usaru ɣef tegrawla tazzayrit i mucaɛen deg umaḍal merra. Ikemmel wahil ass-nni n ttlata, 20 ɣuct 2019, s waṭas n leqdicat deg ddeqs n yimukan.
Dɣa, deg Uxxam n yidles Mulud Mɛemmeri, kemmlent temsikniyin-nni n yidlisen d yimagraden. Ma ɣef 10h00, deg tzeqqa tameẓyant, yella-d usenɛet n usaru “Tawrirt Yettwattun” n umsuffeɣ Abderrahmane Bouguermouh. Syin akkin, ɣef 14h00 n tmeddit, yella-d usarag n Mass Arezki Ferrad akked Mass Ahcène Begriche, am wakken diɣ i d-llant tnagiyin n yimjuhadnniḍen ɣef tallit-agi n tegrawla. Ma deg Uxxam n umezgun Kateb Yasin, tella-d turart n yiwet n tmezgunt yesɛan assaɣ akked usmekti-a.
Ma deg Uxxam n ssinima n Tizi Uzzu, yella-d uskan n usaru “Tarwa n unbir” n umsuffeɣ Moussa Haddad, i d-yettmeslayen ɣef tallit-agi n 1954- 1962. Ass-nni n lexmis, 22 ɣuct 2019, tella-d tirza d usterḥem ɣef yiman n umeɣras Si Abdallah Maghni, yettwameḍlen deg taddart-is Ibsekriene di tɣiwant n Uɣrib. Yella-d diɣ usersi n tmuqqint n yijeǧǧigen ɣef uẓekka-s akked ddqiqa n tsussmi ɣer rruḥ-is. Am wakken diɣ i d-llan waṭas n leqdicat-nniḍen, tameɣra n tarrazt i twacult tagrawliwt n tamaa, afraq n warrazen ɣef yinelmaden i d-yufraren deg yikayaden…atg. Ɣer taggara, ad d-nesmekti belli ameɣras Si Abdellah Manghi s yisem-is aḥeqqani Maghni Mohamed Salah, yella d aɣella deg lɛesker n tmurt deg lwilaya tamazrayt tis tlata ( tamurt n leqbayel). Yettwanɣa di tallit-nni n temhelt “Jumelles”, deg Ihnouchene ass 22 ɣuct 1959, di leɛmer-is ala 40 n yiseggasen.
Ghani Amazigh