D leqdic i d-thegga tddukkla tadelsant Taflest n Tizi Uzzu s tallelt n Wammas n Lhu Ussnan (CLS) n Tizi Uzzu, ɣef teɣzi n sin wussan.
Yebda iḍelli n lḥed, 30 yulyu 2019, ad ikemmel ass-agi n letnayen, 1 yulyu 2019, deg Wammas n Lhu Ussnan n Tizi Uzzu. Aṭas n leqdicat idelsanen i d-yettilin deg-s, gar-asen timsikniyin ɣef tudert d yimuhal n bab n tejmilt-agi Tahar Ousseddik.
Ɣer tama n temsizzelt n tmedyazt yettwasrekben (montage poétique), ad ilin yisaragen n yimsirgen-agi: Abdenour Abdeslam, Helouan Hachene, Bilak Hamid, Abdennbi Ramdhan akked Chemakh Said. Deffir n usarag-agi kan, yella-d usenzi s ubuddu n yidlisen uran yimsirgen-agi.
Ma d inebgawen n lḥerma n tfaska-agi d acennay ameqqran Taleb Tahar akked umedyaz Ahcene Mariche. Ɣer taggara, ad d-nesmekti kan belli Tahar Ousseddik, ilul ass n, 20 yennayer 1913, deg Sidi Naamane (Tigzirt), yemmut ass n, 26 tuber 1994, deg Lezzayer Tamaneɣt. Yella d aselmad i wacḥal d aseggas, yuɣal d amaswaḍ, yexdem daɣen deg tkadimt n Lezzayer.
Di tira, yeǧǧa-d: Llala Fatma n Summer, Les poulains de la liberté, Oumeri, Si Smail, La Berberie…
Gh. A.