Accueil Tamazight D tefsut n Yimaziɣen, neɣ n Yiqbayliyen kan ?

D tefsut n Yimaziɣen, neɣ n Yiqbayliyen kan ?

131

Ass n 20 yebrir 2019 i d amulli wis 39 n Tefsut n ttmanyin, wis 18 n Tefsut Taberkant. D azemz i aɣ-d-yesmektayen ilemẓiyen-nni ileqqaqen i yeɣlin s rrsas n udabu azzayri imi kkren ad sutren tilelli, tugdut d ulmad n tutlayt-nsen deg uɣerbaz. Kra n yimalasen dɣa send ttiɛad-a n usfuggel d usmekti, aṭas n tamiwin d tddukkliwin i d-yegren tiɣri i tikli di Bgayet, Tizi Uzzu d Tubiret, abeɛda Amussu n ufraniman n Tmurt n Yiqbayliyen. Maca daɣen, seld aberriḥ-nni mucaɛen n « Xawa-xawa », i d-yeffɣen di tnekkra-a taɣerfant n ugdud azzayri, yella inuḥ usirem ɣur waṭas n yimdanen d kra n yimeɣnasen akken zun ad d-ilint tekliwin-a n usmekti ula deg temnaḍin-nniḍen n Lezzayer. I wakken xersum ad d-tbin ugar tegmat-a i ttawin ddeqs deg yimawen-nsen.

D acu kan, ayen i aɣ-d-yesken wass n sed 20 yebrir 2019, icuba kan wayen nwala deg yiseggasen iɛeddan, ulamma d amussu n MAK i yeṭṭfen tasga tameqqrant. Meḥsub, ulac akk win i d-yerran i tiɣri n « xawa-xawa » seg twilayin-nniḍen n Lezzayer ideg ur ssawalen taqbaylit. Ɣef waya dɣa, ddeqs n yimura, ineɣmasen d yimeɣnasen, i d-yuran deg yiẓeḍwan inmettiyen, mesteqsan ɣef wamek teffeɣ taggara taluft-a. Ad d-nesmekti d akken llant-d tekliwin di kraḍ n twilayin n tmurt n Yizwawen, ɣas ulamma yella wanida tewɛer tikli neɣ ur wwiḍen yimeɣnasen s amkan di lawan.

Ula d acennay amḥaddi Zedek Mulud, yuɣal-d beddemma si Fransa akken ad yelḥu d ugdud ɣef yiman n yimeɣrasen n Tefsut n ttmanyin d Tefsut taberkant. Daɣen, i uselɣu, gar wudmawen i yekkin deg tikli, yella uselway aqbur n Ugraw i yidles d tugdut (RCD) Mass Saɛid Seɛdi akked yisegbaren iqdimen n Umussu Adelsan Amaziɣ (MCB). Ma yella d akabar n FFS ur d-iban, amzun akken ur t-teɛni taluft. Ɣas ahat llan deg-s yimeɣnasen, maca tasertit n ukabar tḥettem-d abrid-nniḍen taggara-a. Seld agemmuḍ-nniḍen ideg ala Iqbayliyen i d-yesmektayen tifsutin-a n tnekkra, aṭas i yettmesteqsayen dɣa ma yella ad nessawal i Tefsut n ttmanyin «Tefsut n Yimaziɣen» neɣ «Tefsut n Yiqbayliyen»?

M. K.