Yebna yimal n tmura s umata ɣef ufmiḍi n yilemẓiyen i sεant. Ayagi imi ineggura-a, d afud i izewṛen nezzeh. Sεan tazmert d lebɣi, ama i uxeddim, neɣ i usnulfu. Dɣa, imi i d-nemmeslay ɣef waya, yewwi-d fell ad d-nebder tiddukkla Ayyur Azeggaɣ(Croisson rouge) n Yiɣil Ɛli. Taneggarut-a i iqeddcen deg unnar ugar n ukuẓ n yiseggasen-aya, tesεa azal meqqṛen deg tdayṛa-a, imi teṣṣefṛeḥ acḥal n wulawen, tefra ddeqs n yiɣeblan. Ad d-nesmekti d akken di tazwara n umecwaṛ-nsen, llan d tarbaεt n yilemẓiyen, azal n 15 yid-sen.
Ttemlilin gar-asen, ttmeslayen ɣef wid yesran i ufus n tallelt, jemmεen-d idrimen sɣur wid yesεan di taddart, d wid yenwan ad seddqen, ttaɣen-d yis-sen ddeqs n temsal, ferrqen-tent ɣef wid ur nesεi. Ama d tagella, ama d lqecc neɣ d ayen-nniḍen. Yerna ttdawin ula d wid yuḍnen s yidrimen-nni. Ayagi yebda deg useggas n 2016. Dɣa uɣen-d lqec n lεid tameqqṛant, akked sin n yiεejmiyen, bḍan-ten ɣef wid yeḥwaǧen. Seg imir-n kemmlen aqeddic-nsen, ttjemmiεen idrimen seg Yiɣil Ɛli d kra n temnaḍin-nniḍen. Lameεna ass-n mi slan yiɣallen n laman s waya, εnan-ten-id, nnan-asen belli ur tesεim ara azref, acku txeddmem beṛṛa n uṣaḍuf. D ayen i ten-yeǧǧan ṛwan tazzla armi i d-snulfan tiddukkla-nsen « Ayyur Azeggaɣ », i yesεan iswi-s amezwaru d aεiwen n yimeεḍaṛ, imuḍan, akked wid yeḥwaǧen afus n tallelt.
Di taggara, yeffeɣ leεtab-nsen ɣer tafat, imi deg useggas-a n 2019, uɣalen sεan tiddukkla, sellḥayen-tt s uṣaḍuf. D tidet ur sεin ara aṭaṣ n ttawilat, ula d tazeqqa n unejmuε ur tt-ksiben ara, ameεna tarbaεt-agi n yilemẓiyen, deg 22 yid-sen ur ssinen d acu d awezɣi, zgan d aseḥbiber i ubaɣuṛ n wid ixuṣṣen. Di taggara, ad ten-nesnemmer ɣef uxeddim igerrzen i xeddmen, nessaram teɣzi n leεmeṛ i tddukkla-nsen.
K. K.