Accueil Tamazight Deg Ayt Smaɛel

AMENZU N YENNAYER - Ixf n useggas ɣer yimaziɣen

Deg Ayt Smaɛel

102

I lmend n usfuggel i d-yeṭṭafaren yennayer, ixef n useggas n Yimaziɣen 2970, thegga-d tddukkla tadelsant Adrar n Fad kra n warmuden ɣef teɣzi n sin n wussan. Ɣur tddukkla-a, azemz-a d azamulan deg umezruy imi tezga tesmektay-it-id di taddart tamsedrart n Ayt Smaɛel. Yebda wahil ass n sem tasebḥit, 11 deg wayyur n yennayer, s teldayt n temsikniyin yemgaraden ɣef yidles amaziɣ, tigemmi d wayen i d-yettawin kra n yisallen ɣef Yennayer. Syin akkin, am yal aseggas, ttwaferqent terqiqin (teɣrifin) i yimezdaɣ di tlemmast n Tregragt, di tegnit n tegmat gar medden d tumert deg wudmawen.

Kra n wakud akken, yettwaheyya-d yiwen n wurar adelsan i warrac ur nessamed 15 n yiseggasen. Deg-s, ddan-d yisteqsiyen ɣef yidles s umata d umezruy yeggugen n Yennayer. «Yelha usfuggel-a n yennayer i d-yettilin yal aseggas imi ad yessin uɣerman ugar azamul-a. D acu kan, nessarem lemmer akk tidukkliwin n tɣiwant-nneɣ grent-d irebbi i ttiɛad am wa, acku yesɛa azal d ageɛmir», akka i d-yenna yiwen n umezdaɣ n Ayt Smaɛel. Mettwal tazeggant n wass ahat, ddeqs n yinelmaden i yekkin deg tuffɣa i d-yettwasuddsen i ubaɣur-nsen ɣer udrar aɛlayan n Takkuct, i yefkan cwiṭ s wudem i win n Udrar n Fad.

Ad d-nesmekti d akken tella-d tirzi-a s lxusus i ubaɣur n yinelmaden ifazzen n yiɣerbazen imenza n tɣiwant n Ayt Smaɛel, am terzeft ɣef tnimar i ixedmen deg umecwar-nsen n tɣuri ar tura. Akken dɣa, armi ahaqel-itt d 14:30, yewweḍ-d lawan n tikci n warrazen i yettunefken i wid i d-yufraren deg yimsizwar i d-yellan. Yuɣ lḥal, ɛnan warrazen-a kraḍ n yimenza n yal amsizwer kan. Azekka-nni d acer, tekki tddukkla s yiwet n temsikent deg Uxxam n yidles Tawes Ɛemruc n Bgayet, ideg i d-ttwasneɛten yiqeddicen n tddukkla d tɣawsiwin n tgemmi.

M. K.