Accueil Tamazight ‘’Deg unebdu n useggas n 2 000 i nemwala i tikkelt taneggarut...

Amer Mezdad, d tasuta tamezwarut n yineggalen : ‘’Deg unebdu n useggas n 2 000 i nemwala i tikkelt taneggarut akked Rachid Alliche deg Uxxam n yidles…’’

163
- PUBLICITÉ -

Amer Mezdad, d aneggal ur neḥbis tira seg wasmi i tt-yebda ar ass-a. Ma nwali deg uḥric n usizreg, ad naf drus maḍi maḍi i d-yeddan deg tikli-a. Imi d tasuta n yineggalen imezwura, yecban Rachid Alliche d Said Sadi, ihi nesteqsa-t ɣef tegnit n tira deg yiseggasen-nni imezwura akked wassaɣ i yellan gar-as d Rachid Alliche. Ha-t-an wacu i d-yenna : “ Imir-n, nedder am yinelmaden imesdurar : si temẓi, mgal abrid asertan i d-yewwi udabu si 1962. Akken ulac akabar, ulac tuddsa yettnaɣen mgal adabu di tallit-nni, akken nwala daɣen wid i aɣ-iɣelben di leεmer, wa yemmut, wa yenfa, banen-aɣ-d yiberdan i d-yeqqimen, deyyqen : dɣa newwi di tallit-nni, win nwala yezmer ad yesuffeɣ nnfaε i tmeslayt d yidles-nneɣ, ngemmeḍ takriṭ.

- PUBLICITÉ -

Di tazwara, nerra-tt i walmud n tmeslayt, imi akken ma nella, nekka-d akk seg temsirin yettakk Mulud Mεemmri. Kra deg-neɣ daɣen, ideg yella Said, ideg lliɣ, yejbed-iten ubrid i d-yewwi Kateb Yasin s amezgun. Rran-d ɣer teqbaylit ayen yura umaru ageεemir : « Ddem tabalizt-ik, a Muḥ », « Aɣebbar s allen », « Lgirra n 20 timmaḍ », atg… Adabu yellan di tallit-nni, am wakken yesuref kra axeddim-a n tmaziɣt, ahat iwala ulac amihi ara d-yekken sɣur-neɣ. Nurar amezgun, nεedda-d di rradyu ɣas akken tikkwal ttilin-d wuguren seg tama n yibaɛtiyen. Nessekles tizlatin, nettekki di tfaskwin, nger iman-nneɣ deg uskasi i d-yettilin deg unnar azayaz. Xas tilelli tettuḥekkem, meɛna nekni, nezga nenna-d ixemmimen-nneɣ. Yebda udabu imeddel tiwwura asmi i d-nnulfan widak yessersen lmumbat.

Ma d tira s teqbaylit, nekk s timmad-iw, ur as-giɣ ara yakk « ma », imi zik i tt-bdiɣ, asmi lliɣ di lkulij. Acu, iseggasen-nni, ur nufi ara anida ara nsenned, neɣ wid ara aɣ-yemlen tanila, anagar ayen tesmeckukul temẓi-nneɣ ! Ma ɣef Rachid Alliche, zemreɣ ad d-iniɣ yessemras taqbaylit timserreḥt, tira taseklant deg wungalen-is. Assa m wass-a, zrin 30 n yiseggasen, mačči aṭas i tt-yurzen am netta ! Ma tameddurt tudmawant n Rachid, ur tt-ssineɣ ara imi d awezɣi newwi-d fell-as awal gar-aneɣ. Yerna akken xeddmen wat tsuta-nneɣ, tameddurt tudmawant tezga fell-as tduli.

Ẓriɣ kan yeɣra tusnakt, ẓriɣ yezri-d kra n tallit di Fransa, syin yuɣal-d ixeddem di tmanaɣt, acu urǧin yegzim assaɣ d taddart-is. Tikkelt taneggarut i mwalant wallen, tella-d deg Uxxam n yidles deg unebdu 2 000. Nexdem dinna asnuz n tedlisin s ubuddu. Nekk serseɣ yiwen wungal, netta yesers-d tadlist-nni yura ɣef ‘’Tmaziɣt i imecṭuḥen’’. Cfiɣ neqqim seg ssbeḥ armi d tameddit dinna, di rrayeεn ur aɣ-ffiɣent ara tedlisin-nni i d-nesers. Tameddit n wass-nnni, am wakken ur necrih ara nezzeh. Nefka-d akken yiwet n tdiwennit i uɣmis ‘’Liberté’’. Nexdem isenfaren n tdiwenniyin i Radyu akked d usaru i sinima. Ass yettakk-it i wayeḍ, ur aɣ-yefki ara wakud tagnit akken ad nemyagar. Ma d assaɣ-nneɣ s tilifun, urǧin yegzim”.

H. Moula

- PUBLICITÉ -