Accueil Tamazight Djellaoui : «Tamsalt n tira n tmaziɣt, d Takadimit ara tt-yefrun»

Tira n tutlayt tamaziɣt

Djellaoui : «Tamsalt n tira n tmaziɣt, d Takadimit ara tt-yefrun»

118

Tamsalt n usekkil swayes ara tettwaru tutlayt tamaziɣt d Takadimit tazzayrit n tutlayt tamaziɣt ara tt-yefrun, ɣef wakken i t-id-yenna, ass-nni n larebɛa deg Tizi Uzzu, upṛufisur Mohamed Djellaoui, i yellan d aselway n tsuddut-a ay d-yettwasbedden seg melmi kan.

Yenna-d belli : « Tamsalt n tira ad tt-tefru Tkadimit tazzayrit n tutlayt tamaziɣt i yellan d tasuddut tilellit, d nettat i yesɛan azref ad teg aya ». Am wakken i d-yerna d akken amahil ara d-yilin i lmend n waya, ad yili d ussnan yerna d asdawan, war ma tettekka deg-s tsertit neɣ tesnakt.

Am wakken, ur yezmir ara ad d-yili umahil-a berra n tesmilin ara igen inadiyen i yessefken i lmend n waya. Imi yetturaǧu ad ilin tlata n yisikwan ara iqedcen s tlata n yisekkilen yemxalafen (alaṭini, tifinaɣ d win n taɛrabt). Yenna-d daɣen Upṛufisur Djellaoui, belli « mačči d asekkil swayes ara tettwaru tmaziɣt i d tamsalt ideg ara tezwir tseddut-agi ».

Maca tuzwirt tamezwarut n Tkadimit tazzayrit n tutlayt tamaziɣt, ɣef wakken i t-id-iberreḥ d aheggi n usegzawal awelhan (référentiel) n tmaziɣt. Dɣa i lmend n waya, yenna-d : « Iswi amezwaru n tkadimit-nneɣ d aheggi n usegzawal awelhan n tutlayt tamaziɣt uqbel ma nelha-d d temsal-nniḍen i yesɛan akk tixxutert i unegmu n tutlayt-a ».

Yemmeslay-d daɣen ɣef uxeddim yettraǧun takadimit-agi, iwala d akken : « Amahil-a n tkadimit i d-aɣ-yettraǧun d taɛkemt ẓẓayen yerna d imazzagen n tutlayt ara d-yelhun yid-s ». Ma deg wayen yerzan « alqaḍ d uḥawec deg unnar d uḥraz n tgemmi tarangant tamaziɣt », yenna-d d akken amahil-a d win ara iqelɛen seg wakk imahilen i yellan.

A. A