Accueil Tamazight Drus n Tmezgunin tiẓẓawaniyin i yellan s teqbaylit, ha-tt-an terna-d yiwet ɣer-sent

Tamezgunt taẓẓawanit Si Muḥend Umḥend

Drus n Tmezgunin tiẓẓawaniyin i yellan s teqbaylit, ha-tt-an terna-d yiwet ɣer-sent

257

Ssaɛa uqbel ad tebdu tmezgunt, yuɣ lḥal Axxam n umezgun Kateb Yacine yenfel s lɣaci, ineggura ur d-uffin akersiw iɣef ara qqimen. Ddeqs-aya i medlent tewwura ssebba n Kuruna Covid-19. Imdanen fuden taẓuri. Mačči kan d acedhi n umezgun i ten-id-yewwin meɛna ittekki usentel iɣef ara d-tawi tmezgunt-agi. D amussnaw amedyaz Si Muḥend Umḥend iwumi fkan tudert ɣef ussayes, yurar-d tudert-is, yewwi-d seg ugerruj n yisefra-s. Si Muḥ, isem-is inuda-d lewḍayat yezger timura. Isefra-s, ddren ɣef yilsawen n yimdanen iceffun, zegren-d talliyin armi i d-leḥqen ɣer tizi n wass-a. Timawit, tefka-ten i tira ; deg yidlisen ttwaḥerzen. Ass n, 22 deg maggu 2021, deg Uxxam n umezgun Kateb Yacine, taẓuri tger-as irebbi.

Gar wallen n yimeshanayen i d-tɛedda tudert n Si Muḥ, unagen s tfekka akked ṛṛuḥ d texmam armi d tallit n zik, ddren-d yid-s temẓi n ucawrar azehwani iɣef ixeddem baba-s. Ḥedren mi akken i as-yemmal zzher isenned ɣer wufal armi d asmi i as-yeffeɣ yiziɣer ɣef tɣerɣert n temrabḍin Iṛumyen. Nwala s tidet Si Muḥ iteddu s yiḍarren-is ɣef ussayes am wakken yuɣal-d seg wat laxart  yegla-d ula s yimdanen imucaɛen di tallit-ines am Si Ɛmar Saɛid Bulifa akked Yusef Uqasi amedyaz n Wat Jennad. Yegla-d ula s Ccix n Ṭaqa n Wat Yeḥya Ccix Muḥend Ulḥusin. I as-yernan sser d thuski i tmezgunt taẓẓawanit « Si Muḥend Umḥend » d ccnawi s unya n teqbaylit akked ccḍeḥ aɣerfan. D tiwizi meqqren ideg llan 29 n yiwiziwen yerna seg wid yufraren.  

D iwiziwin s wazal-nsen i as-yekkren i leqdic-agi armi i d-yufaf. Ad nebdu seg Mukrab Lyas, mačči n wass-a d aqdim deg unnar, ddeqs n tmezgunin i yessuli gar-asent : « Tacbaylit » n Muḥya, « Takna », « Tayri teǧǧa tmacint » , « Takessna n Massinisa », «  Juba 1 akked Juba 2 » … Tikelt-agi, yuɣal-aɣ-d s uɛeqqa n sser i yedhen s tira-s akked lekyasa-s. Ad nuɣal ɣer ccnawi akked unya iẓẓunen iziɣer, d ilmeẓẓyen i d-ibanen s ṣṣut-nsen akked ccna zeddigen. Ad d-nebder Waɛli Rezgi, Milisa Sexxi akked Muhri Billal, Diddani Munir …

Ur nettettu 6 n yiceṭṭaḥen yetturaren s yigmamen, ifettlen s wammas akken ad d-senfalin tugniwin neɣ ayen ur yezmir yimi ad t-id-yinni. Tefreḥ teqbaylit, netta i yesɛan tarwa i tt-ixeddmen s wul, ṛebban fell-as tismin akken ad d-tufrar. Tamezgunt Taẓẓawanit «  Si Muḥend Umḥend » ad tekcem deg umezruy n umezgun amaziɣ, ad d-ternu ɣer tmezgunin tiẓẓawaniyin i yellan yakkan, xas ulama drus i yellan. Akka ara yennerni umezgun, ad ṛẓen leqyud akken ad d-yili kra n wayen yenna Si Muḥ,  mebla leḥya, mebla tugdi.

Lyes Belaidi