Accueil Tamazight Fercen-d yinelmaden uguren-nsen deg ubrid

Tasdawit Lmulud At Mɛemmer

Fercen-d yinelmaden uguren-nsen deg ubrid

39

Yal asseggas, ttmagaren yinelmaden n tsedawit Lmulud At Mɛemmer aṭas n yiɣeblan i yerran taɣuri d ayen ẓẓayen fell-asen. Tikelt-a, rnant-d kra n temsal i yessawḍen inelmaden i wakken ad sbeggnen lɣiḍ-nsen ɣef liḥala sanda tewwed tesdawit-nsen ( iɣiwnen akked igezduyen).

Iferdisen n tirkeftin n yigezduyen yemgaraden, tteɛraden mi ara yili uɣbel neɣ kra n taluft, ad-as-id-afen tifrat, cɣel-a dayen yesefraḥen. Abrid-a mi mlalen yiferdisen n terkeftin di temlilit iwumi qqaren CLE, mmeslayen ɣef yakk iɣeblan i ttidiren yinelmaden di tesdawit n Tizi Uzzu deg usseggas-a n tɣuri 2018-2019, anida i mmsefhamen ɣef waṭas n tɣawsiwin.

Ihi ass-nni n aram, 05 deg furar 2019, lḥan yinelmaden n tesdawit Lmulud At Mɛemmer n Tizi Uzzu si Ḥesnawa armi d Axxam n lwilaya i wakken ad d-inin « Ala i tmuḥeqqranit n unelmad imi d netta i d asirem n tmurt ». Wwin yid-sen yinelmaden n tesdawit, tiwriqin, tibluzin, uran fell-asent, belli « Ulac d acu i d-nesnulfa, ulac alsaru, d lwert kan i d-newret », « Nebɛed ɣef udabu, neqreb ɣer tmussni ».

Aya, i wakken ad sbeggnen asḥissef-nsen ɣef liḥala uɣur tewweḍ tesdawit-nsen. Teḍra-d tikli-a n yinelmaden tegnatin yelhan, imi anelmad d azamul n ttrebga d tmussni. Fkan-d yinelmaden tamuɣli-nsen lqayen, u ssaramen ad d-awin izerfan-nsen i wakken ad uɣalen ɣer tɣuri-nsen, imi iswi-nsen yakk d yiwen d afrari di leqraya-nsen taɛlayant.

Dahlal Chanez