Accueil Tamazight Ffɣen-d yimawlan n yinelmaden mgal aselmed n tmaziɣt

Blida

Ffɣen-d yimawlan n yinelmaden mgal aselmed n tmaziɣt

34

Seld mi d-kkren yimawlan deg ddeqs n twilayin seg tazwara n useggas mgal aselmed n tutlayt n Masensen i tarwa-nsen, am di Timucent, Tisemsilt, Ɣilizan d Lezzayer tamanaɣt…atg. Ssmana-a, d nnuba n twilayt n Blida, imi i d-ffɣen kra n yimawlan (d tullas) deg tama n Wlad Yeɛɛic sdat n uɣerbaz amenzu Bukabus Lɛerbi, refden tirawin i d-yeqqaren tutlayt n tmaziɣt d tafrant mačči d timḥettemt i yinelmaden, “Ma yehwa-aɣ ad tt-telmed tarwa-nneɣ, ma yehwa-aɣ ala”. Ma d timental iɣef i senden qwant, gar-asent; tamaziɣt trennu-d taẓẓayt i wahil n yinelmaden s zzyada ɣef yilmuden akk sɛan.

Ameṣruf n zzyada s tiɣin n yidlisen n tmaziɣt ! akken daɣen i tessenɣas deg wakud n tarwa-nsen ma bɣan ad heggin deg uxxam i temsirin n uzekka-nni. Acku akken ttwalin, tutlayt n tmaziɣt ur telli d tagejdant deg uɣerbaz, ɣef waya almad-insen ur yezmir ad yessuffeɣ sani ! Rnu ɣer waya, ur tesɛi ara imal, imi ur d-yettek seg-s uxeddim. Ssebba-nniḍen iɣef ddurin, nnan d akken tuɛer tutlayt-a i tigzi akked tmeslayt, ɣef wayagi, ulayɣer ara tt-lemden warrac-nsen. Tadyant-a yeḍran di Blida, teḍra yakan di temnaḍin-nniḍen akken i d-nezwar deg-s, nemmeslay-d yakan ɣef tamawt-a deg Uɣmis n yimaziɣen deg cutember.

Teḍra daɣen deg temnaḍt n Ǧiǧel ilindi, dɣa ussan-nni i gan yinelmaden n tesnawiyin n tmurt n Leqbayel asunded d tikliwin, limer mačči d taneɣlaft n usegmi taqdimt Massa Ben Ɣebriṭ i d-yegren iman-is lawan-nni. Tadyant n tikkelt-a daɣen teǧǧa aṭas n yiqbayliyen ad rren tiririt, u ad d-ffɣen si tsusmi-nsen, ladɣa deg yigrawen n uẓeṭṭa inmetti Facebook anida i d-sbegnen tibuɣert n tutlayt n tmaziɣt d wayen tekseb deg waṭas n taɣulin am tsekla, amawal, tajerrumt d umezruy… Bla ma nettu d nettat i d tutlayt n laṣel n tmurt, ɣef waya i d-yewwi ad tettwaqader, ad tettwaselmad, mačči ad tt-ɣunzun yizzayriyen. Llan wid i d-yennan ma ikemmel akka deg temnaḍin tiɛerbawalin uɣunzu n tutlayt n yimaziɣen, yewwi-d ula d tamurt n leqbayel ad tɣunzu tutlayt n taɛrabt, imir ad yeḥṣel uxlul di lɣiḍa. Ad ittuḥettem ɣef yimasayen yeṭṭfen aḥric n leqraya di tmurt n Lezzayer, ad d-afen tifrat i uɣbel-a.

Kh. A.