Ass-nni n lǧemɛa iɛeddan, 12 deg yunyu 2020, tella-d tulya tunṣibt n unnar aɣiwan amaynut n tɣiwant n At Ɛissa Mimun, yellan deg umkan iwumi ssawalen Bucuba.
Yella-d leqdic s wazal-is ɣef teɣzi n wass, yebda ɣef lewhi n 09h00 n ssbeḥ, yessuli ṭameddit n wass. Tella-d tmeɣra-agi deg wakal n unnar-agi, yettɛen aṭas, dinna dɣa i d-yella kullec. Tebda tmeɣra-agi tassebḥit n wass n lǧemɛa, s tukci n wawal i uselway n tiɣwant-agi, Mass Akli Caɛban i yessnamren aṭas tabɣest d leḥrara n yimeẓyen-a, i d-yellan deffir n waya. Am wakken daɣen i d-mmeslayen yinebgawen-nniḍen n lɛezz d lḥerma, gar-asen Cerif Mellal, aselway n terbaɛt n JSK, ɣer tama n kra n yiɛeggalen n Useqqamu Aɣerfan n Lwilaya n Tizi Uzzu (A.P.W), gar-asen : Malek Ḥessas, d Muḥemmed Aferfuc akked Muḥend Arezqi Ḥemduc, d aɛeggal n Useqqamu Aɣerfan Aɣelnaw (A.P.N). Yella diɣ uselway n tɣiwant n Bujimeɛ, Mass Buxerrub Smaɛil akked yinebgawen-nniḍen. Mbeɛd mi i d-mmeslayen yinebgawen-agi n lḥerma, iberreḥ-d s wudem unṣib uselway n tɣiwant-agi Mass Akli Ceɛban s tulya n unnar-agi aɣiwan amaynut. Syin akkin, tettunefk tegnit i zedwa n yiḍebbalen i d-icebbḥen taqɛet ɣer tama n ccḍeḥ n yimezdaɣ n tɣiwant d yimsuddsen-is. Ma si 11h00 n uzal d tasawent, tella-d lwaɛda meqqren, ideg seččen akk wid i d-yusan ɣer tmeɣra-a. Imi yuɣ lḥal, zlan yiwen uzgar, ass-nni n larebɛa, rnu wwin-d lxeḍra ilaqen i waya. Mi d azizwu, llant-d snat n temliliyin; Tamezwarut tella-d gar yimuraren imeqqraren, tis snat tella-d gar yimurar imecṭaḥ n tɣiwant-agi. Ma ɣer tmeddit n wass, tella-d tmeɣra n ccna, ideg i d-ccnan kra n yicennayen n tɣiwant-agi, gar-asen : Ccab Ɛebdenur, Malek Tebib, Karim Xelfawi…atg. Di taggara, ad d-nesmekti belli, annar-agi yettwaxdam s yidrimen n yimezdaɣ n tɣiwant-agi, i d-yerran i teɣri n teseqqamut i d-yelhan yis-s. Yerna, ɣef wakken i t-id-nnan yiɛeggalen n teseqqamut-agi, wagi d aheggi kan i usenfar n unnar-agi i ttraǧun seg Tenmehla n Yimeẓyen d Waddal n Tizi Uzzu. Annar-agi, yetturaǧu ad iqader akk ilugan n unnar n ddabex uḍar : teɣzi, tehri…atg. Ula d annar-agi, ma yella-d ad d-yernu afud i uḥruc n waddal deg tɣiwant-agi, amek wakken, ara yessebɣes ilmeẓyen n tɣiwant-a akked tddukkliwin n waddal akken ad xedment ugar. Imi mazal taɣiwant n Ait Aissa Mimoun, ur tesɛi ara annar aɣiwan aḥeqqani, imi winna n Tiplakine meẓẓi mliḥ.
Adaoun Abdelghani