Seg wid yesɛan kra n ttawil si tama n tedrimt, aṭas i yesmenyifen, iseggasen-a ineggura, kerru n uṭaksi wala tumnayt tazayezt (transport public), abeɛda ma yella teddun bɛid i waṭas n wakud n usikel.
Deg tsemhuyt-a n usemmiḍ d ugeffur, caḍen seg Ayt Smaɛel wid ikerrun iṭaksiyen i uqḍaw n ccɣel-nsen, ɣer temdint n Bgayet, Seṭṭif, Lezzayer d twilayin-nniḍen. D acu, ugur i d-yettbinen dima, iɣef zgan cektayen, d taɣlayt n ssmawi i suturen deg-sen wat yiṭaksiyen. Ɣef tmuɣli-nsen, ɛeddan yinehharen tilisa deg usuter n ssuma n usiweḍ d leɛtab-nsen.
Ɣur-sen, ssuma n kerru n 3 500 armi d 4 000 n yidinaren seg Ayt Smaɛel ɣer Bgayet, deg tisin d tuɣalin, mačči akk d sswab. Ma yella ɣer Seṭṭif, tettaweḍ tikwal ɣur kra armi d 4 500 neɣ 5 000 n yidinaren. « Neggra di tegnit ideg akken nexdem neḥsel. Ma neṭṭef ifurguten ɣer wanda nebɣa, ur d-nqeṭṭu ccɣel-nneɣ deg yiwen n wass.
Ma nekra albaɛḍ n yiṭaksiyen, ad nefk tazazzert i texriḍt-nneɣ », i d-yenna yiwen n ubabat seg Ayt Smaɛel. Ahat ayen yernan i wugur temɣer d mi uqan cwiṭ yiṭaksiyen-a, ama deg Ayt Smaɛel neɣ di Tsexriwt, akken ad yili umɛaned di sswami ara yettwasmersen ɣef yimsaɣen. Tin ɣer-s, ula d aqeddic n uṭaksi war lekwaɣeḍ isuɛed at tkeryas-a, ɣef leḥsab n medden.
« Tuget n wat yiṭaksiyen ɣur-neɣ, ur sɛin ara lekwaɣeḍ i d-yesbeyyinen tawuri-nsen. Xeddmen kan akken-nni, dɣa ulac win ara imuqlen ssuma i d-sumuren i medden ma deg ubrid neɣ uhu i tella », i d-yenna umezdaɣ-nniḍen.
M. K.