Accueil Tamazight Gar udebdeb n uswir d usnuzgem n yimawlan

Tasnawit n Ayt Smaɛel

Gar udebdeb n uswir d usnuzgem n yimawlan

51

Tezga-d tɣiwant n Ayt Smaɛel deg unẓul-asamar n waɣir n Bgayet, tebɛed fell-as s wazal n 65 n yikilumitr. Ar tura, werɛad teṭṭif tesnawit tamaynut Ḥusin Ayt Ḥmed abrid irekden segmi tettwaldi deg useggas n 2015. Ma nuɣal kan ɣer umḍiq i d-tḥella ilindi deg ukayad n BAC gar tesnawiyin n Bgayet, ad nwali amek mazal d adday uswir-is. Imir-nni dɣa, deg usesmel n tesnawiyin inuḥen di Bgayet, nettat tezga-d gar setta n yimeḍqan ineggura. Tura akka s unemhal d amaynut, mi d-yettqarab ukayad n Bakalurya, yella unezgum d ageɛmir ɣur yibabaten d tyemmatin n warrac, ma ad siwḍen tarwa-nsen ad smurrsen neɣ uhu. Abeɛda imi ẓran yakk amek iga waddad amiran n tesnawit-a d wansi d-tɛedda ayyuren-a yezrin. Ad d-nemmeslay tazwara ɣef usunded i xeddmen seg tikkelt ɣer tayeḍ yinelmaden, ttagin ad yekcem yiwen. Ula d anemhal, qrib i-wwiten yiwen n ubrid mi d-iger iman-is ad yefru taluft ɣer tuɣalin ɣer tneɣrit. Tikwal am wakken bɣan yinelmaden inubiyen, ad d-ḥettmen nutni asaḍuf-nsen ɣef tenmehla n usɣur-a aɣurbiz d yimawlan. Si tama-nniḍen, ɣef leḥsab n teɣbalut-nneɣ, tikli i d-ttawin din kra n yinelmaden taggara-a mačči d tin yessefraḥen. Ula d tihyufin yekker wawal deg yakk tiɣemmar n tɣiwant belli ttwawfent ɣur yiwet n tnelmadt daxel tesnawit-a gedged, war ma tban-d teɣbalut.
D ayen i yeǧǧan imawlan, rnan anezgum ɣef tarwa-nsen i ugaden ad ttwaṭṭfen deg tqeffet-a tamihant, deg wakud ideg yewwi-d fell-asen ad d-lhun d tɣuri-nsen, ad kemmlen s wudem yelhan lebni n yimal-nsen. «Nesɛa akken ma nella nnuba ad tt-nurar akken ad d-nefk udem yelhan i tesnawit-nneɣ. Ad tebdu seg yinelmaden s timmad-nsen, seg yimawlan, armi d tanmehla n tesnawit-a d yimḍebbren n tɣiwant», i aɣ-d-yenna yiwen n ubabat seg Ayt Smaɛel.

M. K.