Accueil Tamazight Gar yisaragen d tmeɣriwin akked waddal

AïT AISSA MIMOUN - Tuɣalin n leqdicat deg unnar

Gar yisaragen d tmeɣriwin akked waddal

22

Mebɛed n yiwet n tallit taberkant ideg yesbek deg-s leqdic adelsan deg tɣiwant n Ait Aissa Mimoun, ulamma yettili-d leqdic sya ɣer da sɣur kra n tdukla, maca si tegnit ɣer tayeḍ kan; yennayer, 20 yebrir…atg, tineggura-agi, yennerna cwiṭ umussu asddukklan deg tɣiwant-agi, dayen i d-yeglan s tuɣalin n leqdicat idelasen d wid n waddal ɣer unnar. Yal tiddukkla i d-yernan, tewwi-d yid-s amaynut deg wahil-is, ama tinna n waddal n taddart n Ighil Bouchene neɣ tinna n taddart n Tahanouts, ama d tinna n yidles n tɣiwant n Ait Aissa Mimoun. Dɣa i lmend n waggur-agi n Remḍan, yetturaǧu ad yili wahil d anesbaɣur sɣur umussu asddukklan n tama-a.

Ahil n tddukkla tadelsant “Imnar n Tdukli”

D tiddukkla tadelsant “Imnar n Tdukli” n Ait Aissa Mimoun, i yeldin ahil n waggur-agi n Remḍan s usuddes n yisaragen ɣef yisental yemgaraden. Dɣa sendiḍelli n ssebt, 11 maggu 2019, yella-d usarag amezwaru n tddukkla-a, iga-t-id Mass Adaoun Yacine, d amussnaw n tnefsit n umdan. Yewwi-d awal s telqay ɣef unegmu udmawan (Dévelopement personnel) n umdan d wamek ilaq ad yili deg tmetti ladɣa assaɣen-is d yimdanen. Am wakken daɣen i d-yemmeslay ɣef wazal tesɛa teflest n yiman deg tudert n umdan, d wamek i ilaq ad imager umdan uguren n tmetti. D asarag amenzu i d-thegga tddukkla-a deg waggur-agi n Remḍan, yella-d ɣef 21h30 n yiḍ deg usɣim n Waggur Azeggaɣ Azzayri (CRA) n Ait Aissa Mimoun. Yenna-d deg-s umsireg: “Ma neqqar-as kan i wallaɣ-nneɣ ur nessin ara, ur nezmir ara, ad yuɣal ad yamen s yir tikta-agi ur nṣeḥḥa ara…”.

Ikemmel daɣen, yenna-d belli : “Tafelsafit n yiman, d amdan i ilaqen ad tt-id-yexlaq i yiman-is, ad yamen s tɣara n wayen yellan deg-s d wamek iga”. Mi yessuli awal-is, yella-d uskasi sɣur wid yellan deg tzeqqa-nni, yezzi wawal deg-s ɣef waṭas n temsal i d-yeqqnen ɣef usentel-a “Ilaq ad tidireḍ tudert, i ak-id-yettakken tahregt (inspiration)” i yefren Mass Adaoun Yacine ad yili d azwel n usarag-agi-ines. Am wakken daɣen yetturaǧu ad d-ilin sin n yisaragen-nniḍen, yiwen ass n, 17 maggu 2019, ara d-yawin awal ɣef unagraw swayes teddes tmurt n Leqbayel. Ma d aneggaru, ad yili ass, 30 maggu 2019, ɣef waṭṭan n lkenṣir, am wakken daɣen i ittkemmil uheggi n tesfugla ara yettwaxdamen i lfaya n yigerdan ara yettwaḍehren deg wussan i d-iteddun.

Tameɣra n ccna deg taddart n Tahanouts

I lmend n tallit-agi n Remḍan, iɛeggalen n tddukkla n twennaḍt “Amgud” d wid n tddukkla n waddal n taddart n Tahanouts, yetabaɛen ɣer tɣiwant n Ait Aissa Mimoun, heggan-d yiwet n tmeɣra n ccna meqqren. Ula ilmeẓyen n taddart-agi fkan-d afus n tallelt, i wakken ad tili tmeɣra-agi, yetturaǧun ad tili ass n lexmis, 16 mayyu 2019. Ɛlaḥsab n yimsuddsen n leqdic-a, ad tebdu tmeɣra-agi ɣef 22h00 n yiḍ alamma d ṣṣḥur. Ad tili deg umkan ideg i d-tella tinna ixedmen yakan deg useggas n 2017, deg umkan iwumi qqaren Ighil Badhou, tama n unnar n Sidi Slimane. Yetturaǧu, ad ccnun deg-s ma drus 10 n yicennayen ilmeẓyen n taddart-agi n Tahanouts, am wakken daɣen ara tettunefk tegnit i tmenna n yisefra sɣur yimedyazen n taddart-agi dimma. Ɣer tama n leqdicat-nniḍen i izemren ad ilin deg tmeɣra-agi n ccna.

Asarag n ugraw CRAPES n Aït Aissa Mimoun

Am wakken i t-id-ṛeggmen yiɛeggalen n umazday n tedmi d tesleḍt tasertant d tdamsant akked tmettit (CRAPES) n tɣiwant n Ait Aissa Mimoun, i d-ilulen ussan-agi kan ineggura, ad yili leqdic-nsen deg unnar. Tigawt-nsen tamezwarut i yetturaǧun ad tili, d asarag ɣef unegmu idumen s umata d win n tɣiwant n Ait Aissa Mimoun s wuzzig. Am wakken daɣen ara d-yili deg-s umeslay ɣef tdamsa akked twennaḍt d wamek i ilaq ad yeddu umdan deg tudert-is n yal-is. Yetturaǧu diɣ ad tettunefk tegnit i tnagiyin n wid yesɛan tirmit deg uḥric-agi n twennaḍt d wayen i d-icudden ɣur-s, gar-asen afran n yiḍuman…atg. Ad yili usarag-agi, ɣef 21h30 n yiḍ deg uɣerbaz amenzu « Hachemi et fils » n taddart n Tahanouts.

D Mass Arezki Chenane akked uduktur Touat ara yilin d imsirgen. Am wakken daɣen i yetturaǧu ad ilin yirmad-nniḍen deg unnar sya ɣer sdat s yisem n ugraw-agi. Ad d-nesmekti kan belli leqdic-a ad yili s tallelt n tddukkla tadelsant « Imnar n Tdukli » n Ait Aissa Mimoun. Ɣer taggara, yetturaǧu ad yili leqdic anaddal sɣur Ugraw n waddal n taddart n Ighil Bouchene. D timlilit ara d-yilin ass n, 17 maggu deg uɣerbaz amenzu n taddart n Tahanouts, anda yetturaǧu umerẓi gar ddeqs n trebbuyaɛ n kra n ṣṣenf n waddal.

Gh. A.