Accueil Tamazight Ha-ten-in yinaddalen imecṭaḥ di lexṣaṣ ameqqṛan

Xeṛṛaṭa

Ha-ten-in yinaddalen imecṭaḥ di lexṣaṣ ameqqṛan

17

“Win yebɣan yezmer, win yeẓẓan ad d-yemger, Imɣi s cwiṭ n waman ad d-yeggeεmer”. D wigi i d awalen s wacu nezmer ad nebdu ameslay-nneɣ ɣef yiwen n ugraw n yinaddalen imecṭaḥ di tdayṛa n Xeṛṛaṭa. Imi ayen i ttidiren yinaddalen di tmurt-a s umata, mačči d ayen yakk ara ten-yessbeɣsen, limer mačči d leḥmala i sεan deg wulawen-nsen i waddal akked usirem n yimal ifazzen i ten-yesselḥayen. Ass-a, ad d-neddem d amedya, tiddukkla taneddalt Tala Uẓaɣaṛ n tɣiwant n Draε Lqayed. Taneggarut-a, ttidiren yinaddalen-is imectaḥ iεewwiqen igeεmura deg unnaṛ. Ayagi, imi xuṣṣen nezzeh ttawilat n uxeddim deg tddukkla-a. Ula d tazeqqa n waddal, ur tesɛi ara dduzan i asen-ilaqen i usleɣmu. Ula d tadrimt, neɣ d afus n tallelt sɣur wid teεna temsalt ur tnuḥ ara . Lameεna, ccil ulac d acu iseggmen deg ubrid-nsen, itiṭṭuḥen-a εewwlen ad ṛzen afrag n ulamek, imi qeddcen s wayen i asen-tefka teswiεt. Dɣa, rran agama d tazeqqa n usleɣmu-nsen, fuṛsen tasussmi n teẓgi, d ubeḥri-s azedgan, i wakken ad ssalin aswir-nsen, s lebɣi, d teflest deg yiman. Ad d-nesmekti d akken ineddalen-a uziggen deg tazzla, akked uneggez, seknen-d tugna lεali, ladɣa deg umsizwer n yiɣerbazen i d-yellan gar twilayin di tdayṛa n Suq Letnin ussan yezrin. Dɣa, seg terbaεt-nsen, yusa-d Aεrur Neǧm Ddin deg umḍiq wis kṛaḍ, deg umsizwer n warrac. Ma yella deg win n teqcicin, tezga-d Seyad Basma deg umḍiq wis semmus. Ɣer taggara, ma yella nmuqel i lexsas yellan deg tddukkla-nsen, yewwi-d fell-aɣ ad d-nini belli igemmaḍ-a d wid yeṣṣefṛaḥen. Daymi i asen-nessaram afud igerrzen ɣer sdat.
K. K.