Accueil Tamazight Iɛeṭṭel ubrid n Tecruft

Ayt Smaɛel

Iɛeṭṭel ubrid n Tecruft

74

Ad naf taɣiwant n Ayt Smaɛel deg Unẓul-asamar n waɣir n Bgayet, s tebɛed n wazal n 65 n yikilumiṭren seg wul n twilayt. Akken ma tella, truḥ d idurar, imi tuget n yimezdaɣ-is zgan-d gar 600 d 1 100 n tmitratin ɣef yilel.

Am buhan n tɣiwanin, yella waṭas n lexsas deg tɣiwant-a n Ayt Smaɛel armi ur telli seg tid yuẓan deg ddeqs n yiḥricen n tneflit. Ama d ayen yerzan aman n tissit, isɣuren n yidles, tizeɣwa d wannaren n waddal, lgaz agaman, tuqqna ɣer internet d tnezduɣin n uwanek, ulac acu yessefraḥen aɣerman n Ayt Smaɛel degmi akk allalen-a n tudert tatrart ɣaben ar tura.

Dɣa, deg uḥric n yiberdan, ulamma yella-d ubeddel iseggasen ineggura mi ttwaseggmen kra n yiberdan iɣiwanen, mazal ttraǧun yimezdaɣ areqqeɛ d useggem n kra n yiberdan akken ad asen-sehlent ugar tuffɣiwin seg tɣiwant-nsen d tuɣalin ɣer ɣur-s. Amedya n yiberdan i ssaramen Wat Smaɛel ad yemmag s zzirban, yella win n Tecruft i iɛeddan tama n Udrar n Fad. Iqeddicen n ubrid-a, aṭas-a segmi bdan, asenfar daɣen, ɣur-s ddeqs segmi yettwajerred.

Yeffeɣ-d akken ad yili d tamaqqant srid gar tɣiwant n Ayt Smaɛel d Uweqqas, ad izmiren yinehharen idiganen ad sqerren deg ubrid aɣelnaw wis 9 war ma ɛeddan seg Lberj n Mira ideg tḥerres tikli ayendin deg unebdu. Ixeddem azal n 8 n yikilumiṭren deg teɣzi, tura akka mazal-as kra n yiqeddicen n yidil n ubrid s ubiṭun n ubitum, akked wid n tɣellist. Ɣef wakken i d-tewwi teɣbalut-nneɣ, ad yili umaynut ɣef ubrid-a ussan-a i d-iteddun.

«Idrimen yeɛnan akemmel i ubrid-a n Tecruft, llan tura, a-ten-an rsen. Ur tettɛeṭṭil ara ad teṭṭef termist asenfar, ad tebdu lecɣal. Iban sya mi ara d-tekcem tegrest, ad iɛad yemmug merra-is», i d-yenna yiwen n yimḍebber deg tɣiwant n Ayt Smaɛel.
M. K.