Yal mi ara d-yezzi wass 03 mayyu n yal aseggas, tesfugul twacult n tɣamsa deg umaḍal ass agraɣlan n tlelli n tɣamsa. Ass-nni n lǧemɛa, 03-05-2019, i d-yella usmekti n wass n tɣamsa, war ma yella-d kra n leqdic unṣib.
Ulac tijmilin, ulac isaragen, ulac asebɣes n yineɣmasen….atg. Ass-a, mbeɛd 30 n yiseggasen, segmi i yennerna yiger n tɣamsa yettwarun deg tmurt n Lezzayer d 07 n yiseggasen ɣef usliẓri, maca, asteqsi i iceɣben imdanen d wa : Ma d tidet dɣa tella tlelli n umeslay? Segmi, i d-banen yiɣmisen imaynuten, mačči d widak n uwanek kan, yettili-d lḥers fell-asen deg wayen ttarun, ladɣa deg tsertit. Aru-d akka, ur d-ttaru ara akka, ur d-ttmeslay ara ɣef temsalt-agi…atg. Acḥal d tarwiḥt i iruḥen d asfel ɣef tira di tɣamsa ! Ula d asmi i d-nulfant tiliẓriwin timaẓlayin deg useggas n 2012, ikemmel wugur-a n tlellit n usenfali di tɣamsa. D ugur i yeddren ar tizi n wass-a.
Annef tura ɛad i tɣamsa i yellan gar yifassen n uwanek (iɣmisen, rradyuwat d tilibizyuwat), i sedduyen akken bɣan nutni. Lukan d tidet tella tlelli-agi n tɣamsa, tili tilibizyuwat d rradyuwat n tmurt, ad mmeslayent ɣef tmesbaniyin timezwura n 22 furar 2019. D agdal n tmenna n tidet d umeslay ɣef tnekkra-agi n uɣref, i d-yessuffɣen ineɣmasen s iberdan, i wakken ad ssutren tilelli n tɣamsa s tidet. Ineɣmasen n rradyuwat d tilibizyuwat n tmurt, ffɣen-d ad beggnen lɣiḍ-nsen ɣef lḥers ideg ttidiren. D timsal-agi, iɣef i ilaq ad yemmeslay uneɣmas d timezwura, syin ad d-yelhi d temsalt usseɣyed n tɣamsa d ussuddes-ines, mbeɛd 30 n yiseggasen deffir ma yettwarẓem yiger n ttawilat n yisallan. Tin ɣur-s, yezmer ad yessuter Aseqqamu n tezdeg n usadur (conseil d’ethique et de déontologie).
Annect-agi, ɣef leḥsab n yimḍebbren n tmurt-a, ideg yella wugur d tfelsa (crédibilité) n tɣamsa d tissudert-ines neɣ ayen iwumi qqaren s tefransist (la normalisation), dɣa d aya ay yeǧǧan kra n yimsaduren (professionnels) ad walin belli yessefk ad tili tsudut-a akken ad tettwaqader tezdeg d tissudert deg tɣemsa. Akken yebɣu yura uneɣmas, yettqadar ifatusen ɣef yimenzayen n umahil-agi n tɣamsa, ma d aseqqamu-agi i bɣan ad sbedden d aleqqem d usejhed n yimenzayen (principes) n tɣamsa i d-yebder usaḍuf agmanan n uselɣu, i d-yeffɣen deg useggas n 2012 Ɣer taggara, nezmer ad-nini belli tamurt n Lezzayer mačči d isuḍaf i txuṣṣ, maca teqqim-d deg usluɣmu-nsen (aṭṭebbeq) deg unnar.
A. A.