Ass-nni n larebɛa, 29 deg waggur n maggu iɛeddan, i d-yella ukayad aɣurbiz amezwaru n taggara n useggas, wagi d akayad n 5ème. D amecwar iɣef i ilaq ad ɛeddin yinelmaden ara ikemlen almud-nsen deg uɣerbaz alemmas. Yettili-d yal aseggas di taggara n waggur n maggu. Ɣef leḥsab n uɣlif n usegmi aɣelnaw akked yinelmaden, iɛedda ukayad-agi deg tegnatin igerrzen, ulamma yuzzel wawal ɣef usuffeɣ n yisental d tukci n tiriyin sɣur kra n yiselmaden di kra n wammasen n usɛeddi deg wakal n tmurt.
Di lwilaya n Tizi Uzzu, azal n 17 864 n yinelmaden i yesɛeddan akayad-agi n taggara n ulmud amenzu, yettwaferqen ɣef 366 n wammasen n usɛeddi yellan di 20 n ladayrat n lwilaya-a. 448 d inelmaden yeqqaren deg yiɣerbazen usligen, ma d wid i d-yeqqimen d win n yiɣerbazen n uzayez. Llan-d ɣef lmendad n teɛsast-nsen 4718 n yiselmaden d yimaswaḍen akked n yinemhalen. Ma nserwes uṭṭun-agi ɣer winna n useggas iɛeddan, neqsen 857 n yimsizewren. Deg wussan-agi ideg nella ad selken yimseɣtiyen aseɣti n ukayad-agi, imi yetturaǧu ad d-banen yigemmaḍ-is ass n lḥed, 16 yunyu 2019.
Ass wis sin n ukayad n BEM
Iḍelli n lḥed, 9 yunyu 2019, i yebda ukayad n taggara n ulmud deg uɣerbaz alemmas, yettwassnen s yisem n BEM i useggas-agi aɣurbiz 2018/2019. Dɣa deg wayen yerzan uṭṭunen n ukayad-agi di lwilaya n Tizi Uzzu, ad naf azal n 14 327 n yinelmaden, i t-yesɛeddan. Gar-asen 620 d inelmaden iɣurbizen, yeqqaren deg yiɣerbazen usligen, llan daɣen wazal n 702 d inelmaden imunan, ma d ayen i d-yeqqimen d inelmaden iɣurbizen deg yiɣerbazen n uzayez.
Yettili-d usɛeddi n ukayad-agi, deg wass-is wis sin deg 51 n wulmisen n yikayaden, ttilin-d ɣef lmendad-nsen 3530 n yixeddamen n uḥric n usegmi. Uṭṭunen-agi, ṣṣuben cwiṭ ɣef useggas iɛeddan s wazal n 373 n yimsizewren, imi ilindi azal 15300 i t-isɛeddan. Mbeɛd sin wussan n usɛeddi yeḍḥa-d lḥal, gerrzent tegnatin ideg i d-yettili ukayad-agi, i yebdan iḍelli n lḥed, ad ifak azekka n ttlata.
Ad yettqarab ukayad n BAC
Ala 7 n wussan i d aɣ-iferqen ɣef ukayad uneggaru n taggara n useggas aɣurbiz 2018-2019, d akayad i ttraǧun yisnawiyen s ccuq. Lḥed-agi sdat-nneɣ, ara yebdu ukayad n taggara n ulmud asniwi, yettwassnen s ukayad n BAC, ara yeddun ɣef teɣzi n 5 wussan. Ad yebdu ass n lḥed 16 yunyu 2019, ad yekfu ass n 20 yunyu-agi ideg nella.
Deg lwilaya n Tizi Uzzu, tebda tenmehla n usegmi aheggi n ttawilat iwulmen i wakken ad tɛeddi tezrigt n useggas-agi deg tegnatin igerrzen. Dɣa deg wayen yerzan uṭṭunen n ukayad-agi n taggara n uswir n tesnawit (BAC), yetturaǧu ad t-sɛeddin wazal n 18331 n yisnawiyen, yettwaferqen ɣef 70 n wammasen n yikayaden. Uṭṭunen-agi, ṣṣuben cwiṭ ɣef useggas iɛeddan s wazal n 688 n yinelmaden imi ilindi azal 19019 i t-isɛeddan. Ilaq ad d-nini belli wigi ijerden iman-nsen ɣer ukayad n BAC, llan deg-sen 176 d inelmaden iɣurbizen (yeqqaren deg tesnawiyin tusligin), llan wazal n 5906 n yinelmaden imunan. Ma d ayen i d-yeqqimen d inelmaden iɣurbizen deg yiɣerbazen n uzayez (ddula).
Ghani Amazigh