Accueil Tamazight I tikkelt tamezwarut ara tecnu terbaɛ Amzik

Tigzirt

I tikkelt tamezwarut ara tecnu terbaɛ Amzik

29

I tikkelt tis snat, ad d-ilin Wuḍan icebḥen deg Tegzirt, mbaɛd mi i tɛedda tezrigt tamezwarut deg teswiɛin yelhan. Bdant tmeɣriwina ass n, 17 ɣuct iɛeddan deg temdint n Tigzirt. Uqbel-aya, llan-d yakan sin n wussan anda i yecna Rabah Asma, Kamel Igman, Tawes, Malika Domrane d Samir Sadaoui.

D leqdic s wayes ferḥen nezzeh twaculin i d-yerzan ɣer din. Ma yella d ahil n useggas-a, ad naf yejmeɛ-d gar waṭas n leṣnaf n lmuzigat. Yebda wass amezwaru s tmeɣra n Ali Amrane akked ugraw Amzik i yecnan i tikkelt tamezwarut deg tmurt n Lezzayer. Ɣef waya, dɣa, yenna-d Khireddin Kati : “Nefreḥ aṭas imi necna i tikkelt tamezwarut di tmurt-nneɣ. Nugad cwiṭ axaṭer ur nessin ara imferǧen amek ara ilin yiḥulfan-nsen.

Tameɣra-agi, d tamezwarut ara nexdem dagi, ad neɛreḍ amek ara nqenneɛ imferǧen, ad neɛreḍ ad nefk ayen yelhan. Nekni, akken yebɣu yili lḥal, nruḥ-d, aṭas n ttawilat i ixussen dagi maca nussa-d, acku ttwalin-aɣ-d ncennu anda-nniḍen. Ihi tikkelt-agi, ad neccnu di tmurt-nneɣ. Nexdem tameɣra-agi i wid-ak i d aɣ-yessnen akken wid-ak ur d aɣ-nessin ara ad nemyussan”. Nesteqsa-t ma yella kra n umaynut ara d-ttheggin, ha-t-an d acu i d-yerra : “D tidet, ad d-nessufeɣ tasfift tamaynut, dɣa deg tmeɣra-agi, neccna-d kra seg tezlatin-nni. Nexdem-itent d arraz i wid i d-yussan”.

Ussant-d twaculin seg yal tamnaḍt n tmurt i wakken ad ḥeḍrent i tmeɣriwin-agi. Ad ikemmel wahil s teɣzi n ddurt. Ayen i yessemxalfen tazrigt n useggas-agi ɣef tin n yilindi d akken ad tili lemɛawna i tddukkliwin n temnaḍt-agi akken ad sxedment adrim-nni i usizdeg n temdint n Tigzirt, acku tamdint-agi aṭas n yimerriyen i d-yettasen ɣur-s. S wakka ay fkan azal wid i d-iheggan tafaska Uḍan icebḥen n Tegzirt i twennadt. Anect-agi ad iɛawen, mebla ccekk, ciṭ deg usnerni n wudem n temdint-agi i icebḥen.
Yamani Souhila