Tamurt n leqbayel merra, tettak azal d ameqqran i lɣella n uzemmur, imi d tettuneḥsab d amɛic n waṭas n twaculin tiqbaylin.
D acuddu lqayen daɣen gar umdan, tmurt-is akked yiẓuran-is. Dɣa, ad naf di yal lwilaya gar tlata-agi n lwilayat n tmurt n Leqbayel : Bgayet, Tizi Uzzu akked Tubiret, tettili-d tmeɣra neɣ rreḥba n zzit uzemmur neɣ tmeɣra n tzemmurt. Deg umagrad-agi nextar ad d-nawi kan awal ɣef tmeɣriwin yettwaxdamen ar tura.
Tella-d tezrigt tis setta n tmeɣra n tzemmurt deg Ifigha
Mbeɛd mi tekfa tallit n ulqaḍ n uzemmur d ujmeɛ n zzit, yettheggi-d lɛerc n At Ghobri tameɣra n tezmmurt, i d-yettilin di taggara n waggur n furar d tazwara n meɣres. Tazrigt tis seddiset (06) n tmeɣra-agi, tella-d deg tlemmast n taddart Tabourt, yettabaɛen ɣer lɛerc n At Ghebri deg Ifigha. Tella-d tezrigt-agi, ɣef teɣzi n sin wussan ; sendiḍelli n ssebt akked yiḍelli n lḥed. Ahil yettwaxdamen, yella-d d amerkanti sɣur yimsuddsen-agi, aṭas n yirmad i d-yellan deg ttiɛad, ɣef teɣzi n sin wussan-agi iɛeddan. Yebda ass-nni n ssebt,02/03/2019, anda i d-llant aṭas n temsikniyin anida i d-seknen leṣnaf n zzit uzemmur, d wid n uzemmur, tin tewsatin yemxalafen n tamemt, d tin n talaɣt, tiqendyar n leqbayel, lfeṭṭa, isufar i d-ittekken seg zzit n uzemmur…atg.
Am wakken daɣen i d-tella tirza ɣer taddart taqdimt, anda i d-walan yimerriyen ixxamen iqburen n taddart-agi n Tabourt. Ma deg tmeddit n wass, yella-d usarag ɣef uzemmur akked zzit, i d-yewwi Mass Kaci si ssrabes n tfellaḥt n lwilaya n Tizi Uzzu. Llan-d diɣ ɣer tmeddit n wass, leqdicat-nniḍen idelsanen, yecban : ccna, amezgun, urar…atg. Ikemmel wahil n tezrigt-agi, iḍelli n lḥed, s temsikniyin yemgaraden n yisufar n tmurt n leqbayel. Yella-d diɣ usarag wis sin sɣur Mass Arkoub Mouloud d aselmad deg tesdawit Mulud Mɛemmeri n Tizi Uzzu. Ɣer tama ddima n leqdicat-nniḍen ; ccna, timezgunin, timeɣriwin…atg.
…Suddsen-d ula deg Uqbu tazrigt tis 22 n tmeɣra n tzemmurt
Ula d tamnaḍt n Ṣummam di Bgayet, yal aseggas tettili di ttiɛad s yiwet n tmeɣra n tzemmurt meqqren, i yewwḍen aseggas-a ɣer tezrigt tis 22. Tella-d temɣra-agi deg taggara n ddurt-agi, ɣef teɣzi n tlata wussan. Tebda ass-nni n lexmis, 28 furar 2019, tessuli sendiḍelli n ssebt 02 deg waggur-agi n meɣres ideg nella. Tella-d tezrigt-agi tis 22, deg unnar aɣiwan n temdint n Uqbu, deg lwilaya n Bgayet. D leqdic i d-thegga tddukkla i usnerni n tfellaḥt n uzemmur d wayen yeqqnen ɣur-s, iwummi sawalen (ADOIO) n lwilaya n Bgayet.
Yella-d wahil s wazal-is deg tezrigt-agi tamaynut, s waṭas n temsikniyin i d-yellan, ideg i d-seknen leṣnaf n zzit uzemmur, d wid n uzemmur, isufar i d-ittekken seg zzit n uzemmur…atg. Am wakken i d-llan waṭas n yisaragen, i d-yewwin awal ɣef wazal n lɣella-agi deg tdamsa n tmurt, sɣur ddeqs n yimussnawen d yimnadiyen deg uḥric-agi n tfellaḥt.
Ad d-nesmekti kan belli, d lwilaya n Bgayet i yeṭṭfen taqacuct n umyezwar deg tmurt n Lezzayer deg wayen yerzan zzit uzemmur, imi tekseb ugar n 127 750 n tzemrin, yeṭṭfen azal n 60 000 ikeṭaren n wakal deg lwilaya-agi.
… Ula d Tubiret tella di ttiɛad s rreḥba taɣelnawt n zzit uzemmur
Aseggas-a, ula d lwilaya n Tubiret, tessaweḍ ad d-suddes tazrigt tamezwarut n rreḥba taɣelnawt n zzit uzemmur, i yeddan ɣef teɣzi n tlata wussan. Tazrigt-agi, tamenzut i d-yellan deg Uxxam n yidles Ali Zamoun, seg wass-nni n lḥed 03 meɣres armi d ass-nni n ttlata 05 deg waggur-agi ideg nella. Ugar n 30 n yifellaḥen d yimsikniyen i yewwin zzit-nsen uzemmur i wakken ad tt-id-siknen.
D ifellaḥen i d-yerzan si Tizi Uzzu, Bgayet, Burǧ Buɛrariǧ, Bumerdas ɣer tama n wid n Tubiret. Am wakken daɣen i d-llan leqdicat-nniḍen ɣer tama n temsikiyin-agi n zzit uzemmur d wayen akk icudden ɣur-s.
Ghani Amazigh