Mbeɛd mi tezwar Tizi Uzzu ɣer usuddes n temsizzelt yecban tagi di 2006, yettwassnen s yisem n temsizzelt n tezdeg “Aissat Rabah”, terna-d Bgayet s usuddes n temsizwert n tezdeg, i yebdan yakan, tura tezzi-d nnuba n Tubiret, i wakken ad sewjed ula d nettat timsizzelt-is tuzzigt n tezdeg.
Tberreḥ Tenmehla n twennaḍt n lwilaya n Tubiret, s usnulfu n temsizzelt n taddart neɣ lḥuma tazedgant i useggas-agi n 2019. D tazrigt tamezwarut ara d-yilin deg wussan i d-iteddun, ara yefken azref i tuddar neɣ lḥumat n lwilaya-a i wakken ad ttekkint deg-s. Yebda yakan ujerred n tudrin neɣ lḥumat yenwan ad ttekkint deg tezrigt-agi tamezwarut n temsizzelt n tezdeg.
Yetturaǧu sya ɣer taggara n waggur-agi n ɣuct, ad tessali tallit n ujerred i d-yettilin deg Usɣim n Tenmehla n twennaḍt n lwilaya-agi. Mi tekfa tallit-agi, ad tebdu teseqqamut n yinzurfa icerken aṭas n taɣulin, tuffɣiwin-ines ɣer tuddar akked lḥumat yettwajerden, ad yebdu waya seg 27 tuber 2019. Ad yili usenqeḍ d uktazal n temsizzelt ɣef 100 n tezmilin, ama i taddart tazeddgant, ama i lḥuma tazedgant. Ad ttwaferqent akka: Tlata n temsal uɣur ara muqlen mi ara ktazlen lḥuma tazegdant. 30 n tneqqiḍin i uselḥu n yiḍuman, 30 n tneqqiḍin-nniḍen i useddu yimeḍqan izegzawen ɣer tama n 40 n tezmilin tiyaḍ i waddad amatu n lḥuma-nni. Ma deg usenqeḍ n taddart tazedgant, tefren teseqqamut i d-yettwasbedden ad twali ɣer 6 n temsal-agi. Anda fkan 40 n tneqqiḍin i liḥala n yiberdan uzyizen, imeḍqan n lɛamma s 20 n tezmilin, 10 n tneqiḍin i tliwa, timeqbert ɣef 10 n tezmilin ula d imeḍqan n yidles d yisebdaden ɣef 10 n tneqqiḍin ɣer tama n 10 n tezmilin-nniḍen i useddu n yiḍuman.
Ma ɣef warrazen n temsizzelt-agi, tenna tnemhalt n twennaḍt Massa Djouhar Hadj Haddadou belli ad ttwafernent snat n tuddar akked snat n lḥumat timezwura. D Aseqqamu aɣerfan n lwilaya n Tubiret ara yefken tadrimt i tid ara d-yufraren, 5 n yimelyan n dinar i snat n lḥumat ara d-yufaren, 3 n yimelyan i tin ara yeṭṭfen amḍiq amezwaru, 2 n yimelyan i tin ara yawin arraz wis sin. Ma d tuddar ara d-yufraren ad awint 8 n yimelyan n dinar; 5 n yimelyan i tin ara yawin arraz amezwaru, 3 n yimelyan-nniḍen i tin ara yawin arraz wis sin n temsizzelt-agi di tezrigt-is tamezwarut.
Ma ɣef yiswi n temsizwet-agi, tenna-d Massa Djouhar Hadj Haddadou “d asebɣes n twizi gar yimezdaɣ n tudrin d usnerni n tnnumi akked yidles n useḥbiber ɣef twennaḍ deg lwilaya n Tubiret”. Yetturaǧu ad d-banen yigemmaḍ n temsizzelt-agi ass n, 11 duǧember 2019, i lmend n wass amaḍlan n udrar.
Adaoun Abdelghani